NATO bizdan minnatdor bo‘lishi kerak — Tolib Mavlaviy
“Tolibon”ning Hilmand viloyati bo‘yicha gubernatori G‘arbga murojaat bilan chiqdi.
Tolib Mavlaviy bir necha yil davomida NATO kuchlari bilan janglarda qatnashgan. Xususan, Sangin tumanida Britaniya qo‘shinlariga qarshi kuchlarga boshchilik qilgan. Mavlaviy hozirda Hilmand viloyati gubernatori. U qabulxonasida barchani avtomat bilan kutib olayotgan bo‘lsa-da, urush tamom bo‘lganiga ishonadi.
Yangi Gubernator NATOga aʼzo barcha mamlakatlarga: “Afg‘onistonga qurol bilan emas, investitsiyalar bilan qayting. Biz bir-birimiz bilan jang maydonida uchrashganmiz, ammo tinch vaqtda ko‘rishmaganmiz. Hozir siz hukumatimizni tan olish orqali qalblarimizni ishg‘ol qilishingiz va ishonchimizni qozonishingiz mumkin”, degan Mavlaviy.
Shuningdek, u chet el davlatlari Afg‘onistonda ko‘plab kishilarning o‘limiga sabab bo‘lganini alohida qayd etgan. Mavlaviyning so‘zlariga ko‘ra, Afg‘onistonda 20 yildan ziyod tinimsiz urush bo‘ldi va mamlakat odatiy hayotga qaytishi uchun maʼlum vaqt kerak bo‘ladi. Endilikda xalqaro hamjamiyat afg‘on xalqiga gumanitar yordam taqdim etishi, taʼlim, savdo va biznes rivojiga eʼtibor qaratish lozimligi taʼkidlangan. Shuningdek, u “Tolibon” NATOga yordam bergani uchun ular minnatdor bo‘lishi kerakligini aytgan.
Maʼlumot o‘rnida: 15 avgust kuni “Tolibon” harakati Kobulni egallagan. 31 avgustda AQSH Afg‘onistonni to‘liq tark etdi. Harakat tomonidan egallanmagan yagona viloyat Panjsher viloyati edi. Ammo 6 sentyabrda ushbu hudud ham “Tolibon” nazoratiga o‘tdi. Shundan keyin toliblar 7 sentyabr kuni mamlakatning yangi hukumati tuzilaganini eʼlon qildi.
Avvalroq, Termizda Afg‘onistonga gumanitar yordam berish maqsadida logistik markaz tuzilgani xabar qilingandi.
Jahongir Qo‘ziyev
