Xabarda aytilishicha, Afg‘onistondagi so‘nggi hodisalar ortidan Butunjahon oziq-ovqat dasturining Pokiston, Tojikiston va O‘zbekistondagi punktlarida eng zaruriy tovarlarning zahirasi ko‘paytirilgan.
Bu mahsulotlarning barchasi Afg‘onistonga yuboriladi. Xususan, Pokistondagi “Torxam” nazorat punkti orqali so‘nggi uch haftada gumanitar yordam ortilgan 2 kolonna jo‘natilgan. 13 sentyabr kuni esa BMT Qochqinlar masalasi Oliy Komissari boshqarmasi Nangarhor viloyatiga yordam yuborgan.
Jahon hamjamiyati Afg‘onistondagi gumanitar vaziyatdan xavotirda. So‘nggi maʼlumotlarga ko‘ra, 97 foiz afog‘onistonlik qashshoqlik yoqasida turibdi. 14 million fuqaroga esa ochlik xavf solmoqda. BMT Jenevada tashkil etilgan yig‘ilishda Afg‘oniston uchun 1 milliard dollardan ortiq mablag‘ ajratilishini eʼlon qilgan. 14 sentyabr kuni Yevropa Ittifoqi afg‘on xalqiga qo‘shimcha 100 million yevro yordam berishini eʼlon qildi.
14 sentyabr kuni O‘zbekiston Respublikasi Afg‘onistonga 1 ming 300 tonna mahsulot yubordi. Balx viloyatida O‘zbekiston Respublikasi Prezidentining maxsus vakili Ismatulla Ergashev va Surxondaryo viloyati hokimi To‘ra Bobolov rasmiylar bilan uchrashuv o‘tkazgan.
Maʼlumot o‘rnida: 15 avgust kuni “Tolibon” harakati Kobulni egallagan. 31 avgustda AQSH Afg‘onistonni to‘liq tark etdi. Harakat tomonidan egallanmagan yagona viloyat Panjsher edi. Ammo 6 sentyabrda ushbu hudud ham “Tolibon” nazoratiga o‘tdi. Shundan keyin toliblar 7 sentyabr kuni mamlakatning yangi hukumati tuzilaganini eʼlon qildi.
Jahongir Qo‘ziyev