Somalida terrorchilar aeroportni to‘liq vayron qildi
Terrorchilar Somali markaziy qismidagi aeroporti portlatib yubordi. Bu haqda Dalsan telekanali ma’lumotlariga tayanib, “Ria Novosti” xabar bermoqda.
Ma’lum qilinishicha, Somalining Xiran viloyatidagi aeroport “Ash-Shabob” terrorchi guruh jangarilari tomonidan portlatilgan. Oqibatda aeroport to‘liq vayron bo‘lib, 1 kishi halok bo‘lgan. Shuningdek, ikki kishi yaralangan.
“ terrorchilar Buloburd aeroportini vayron qilishi oqibatida 1 kishi halok bo‘lgan va 2 kishi yaralangan”,- Dalsan telekanali axborotida.
“Ash-Shabob” Somali davlatida faoliyat yuritadi. Ushbu guruh “Al-Qoida” xalqaro terroristik tashkiloti bilan mustahkam aloqalarga ega. U Somali markaziy hukumatiga qarshi faoliyat olib boradi. Bu o‘z navbatida BMT gumanitar yordam berishiga katta qiyinchilik tug‘dirmoqda. AQSH doimiy ravishda “Ash-Shabob” marralariga zarba berib keladi.
Eslatib o‘tamiz, avvalroq Afg‘onistonning Kobul aeroportida terakt sodir etilgandi. Oqibatda yuzdan ortiq kishi halok bo‘lgan. Teraktga javobgarlikni ISHID zimmasiga oldi.
