AQSHda bolalar koronavirusga qarshi emlanadi
AQSHda bolalar koronavirusga qarshi emlanadi, deya xabar bermoqda “CNN”.
Xabarda aytilishicha, 12 yoshdan kichik bolalar Pfizer/ BioNTechning maxsus vaksinasi bilan emlanadi. AQSH Oziq-ovqat va dori-darmon nazorati agentligi vakili Jeyms Xildret ushbu tadbir 31-oktabrdan boshlanishini maʼlum qilgan. Shuningdek, o‘tgan haftada koronavirus bilan kasallanganlarning to‘rtdan bir qismi bolalar ekanligi aniqlangan.
Bundan avval AQSHda bolalarni emlash masalasi ko‘rib chiqilayotgani xabar qilingan edi. AQSH bosh infeksionisti Entoni Fauchi oktyabr boshlarida Pfizer‘ning bolalar uchun qo‘llanishi boshlanishiga umid bildirgandi.
Pfizer/BioNTech rahbariyati ham bolalar uchun maxsus vaksina chiqarilayotganini tasdiqlagan. “BioNTech”ning tibbiy tadqiqotlar bo‘yicha direktori Ozlem Turechi yaqin haftalar ichida bolalar uchun yaratilgan vaksina bo‘yicha yakuniy xulosalar berishini maʼlum qilgan. Shuningdek, uni ishlab chiqarishga tayyorgarlik ko‘rilayotgani aytilgandi.
Bundan avval Buyuk Britaniyada ham 12-15 yoshli o‘smirlar COVID-19‘ga qarshi emlanishi mumkinligi haqida xabar berilgan edi.
Jahongir Qo‘ziyev
