AQSh generali Vashington uchun qaysi davlat asosiy harbiy tahdid ekanini aytdi. Bu Xitoy emas
AQSH Qurolli kuchlari shimoliy qo‘mondonlik boshlig‘i general Glen Vanxerk Rossiyani AQSH uchun eng asosiy harbiy tahdid sifatida baholadi. Bu haqda u "Air Force Magazine" nashriga bergan intervyusida aytgan.
“Bugungi kunda Rossiya Amerika uchun eng asosiy harbiy tahdid. Bu Xitoy emas, aynan Rossiya”,– degan general. Uning so‘zlariga ko‘ra, Pekin AQSH uchun uzoq istiqboldagi xavf. Lekin hozir RF o‘z suvosti kemalari, bombardimonchi samolyotlari va qanotli raketalari tufayli katta xavf bo‘lib turibdi. Shu bilan birga kibernetika va kosmik dasturlar bo‘yicha Pekin va Moskvaning kuchi teng, shu sababli ularning har ikkisidan ehtiyotkor bo‘lish kerak.
Vanxerk Arktikada AQSH pozitsiyasini kuchaytirish maqsadida Pentagonni mintaqaga katta resurslarni jalb qilishga chaqirdi. Aks holda Vashington xavf ostida qoladi. Shuningdek, intervyu davomida ballistik raketalar xuddi yadro quroli kabi tiyib turish vositasi ekanini aytgan.
Avvalroq, AQSHning boshqa generali Jon Xayten Rossiya va Xitoy bilan harbiy to‘qnashuv haqida fikr bildirgan. Xayten bu ikki kuch bilan urushga yo‘l qo‘ymaslik eng muhim vazifa ekanini aytgandi.
Jahongir Qo‘ziyev
