Islomoboddan Londonga uchayotgan samolyot yo‘lovchi ayolning o‘limi tufayli Toshkentga favqulodda qo‘ndi
British Airways‘ning Islomoboddan Londonga uchayotgan Boeing 777-200ER samolyoti 22-sentabr kuni Islom Karimov nomidagi Toshkent xalqaro aeroportiga qo‘ndi. Bu haqda Telegram‘dagi «Novosti Tashkentskogo neba» kanali xabar berdi.
Xabarga ko‘ra, Buyuk Britaniyaning Islomobod—London yo‘nalishi bo‘yicha uchayotgan VA-260 reysi ekipaji parvoz vaqtida Toshkentdagi zaxira aeroportga qo‘nish haqida qaror qabul qilishga majbur bo‘lgan.
AviaSpotter‘ning soat 08:30 da eʼlon qilgan maʼlumotiga ko‘ra, ushbu reysdagi 83 yoshli yo‘lovchi ayol o‘zini yomon his qilgan. Samolyot Toshkentga yetib kelganida ayol vafot etgan. Barcha yo‘lovchilar samolyotdan tushirilib, Toshkent aeroporti hududiga joylashtirilgan.
“RIA Novosti”ning yozishicha, bu xabarni Toshkent aeroporti xodimi tasdiqlagan. Uning so‘zlariga ko‘ra, ayolning o‘limiga dastlabki sabab — yurak xuruji bo‘lgan. Ammo marhumaning qaysi davlat fuqarosi ekanligi maʼlum qilinmagan.
Bundan avvalroq, Boeing-C-17 harbiy transport samolyotida inson tanasi qoldiqlari aniqlangandi.
Cho‘lponoy Ahmedova
