“Tolibon”ning BMTdagi vakili masalasi noyabr oyidan oldin hal qilinmaydi
Bu masalada hech kim shoshmoqchi emas, —deb yozadi “Interfaks” BMT manbasiga tayanib.
Mazkur masala Nyu-Yorkda davom etayotgan BMT Bosh Assambleyasida emas, noyabr oyida Vakolatlar qo‘mitasida ko‘rib chiqiladi.
Avval xabar qilinganidek, Afg‘onistonda hokimiyatni qo‘lga olgan “Tolibon” harakati BMT Bosh Assambleyasida chiqish qilishni so‘ragan edi.
BMT Bosh kotibi Antoniu Guterrish “Tolibon” tayinlagan tashqi ishlar vaziri Amir Xon Muttaqidan yuqori darajadagi anjumanlarda "ishtirok etishni so‘rab" maktub oldi, — dedi BMT Bosh kotibi matbuot kotibi Stefan Dyujarrik.
Maktubda Afg‘onistonning sobiq prezidenti Ashraf G‘ani 15 avgustda "hokimiyatdan chetlatilgani" va butun dunyo mamlakatlari "endi uni prezident sifatida tan olmasligi" bildirilgan.
Maktubda yana Afg‘onistonning oldingi hukumati tomonidan tayinlangan doimiy vakili G‘ulom Isakzay BMTda "endi vakillik qilmas”ligi, “Tolibon” uning o‘rniga BMTdagi doimiy vakil etib Suhail Shohinni tayinlagani bildirilgan.
OAV maʼlumotlariga ko‘ra, amaldagi doimiy vakil Isakzay 27-sentabr kuni Bosh Assambleyada chiqish uchun ariza bergan va o‘z delegatsiyasi ro‘yxatini taqdim etgan. Lekin bunga toliblar qatʼiy eʼtiroz bildirib, Isakzay endi mamlakat vakili emasligini aytgan.
OAV maʼlumotlariga ko‘ra, BMT rasmiylari endi Afg‘onistondan kim vakil bo‘lishini hal qilishi kerak. Vakolatlar qo‘mitasining AQSH, Rossiya, Xitoy, Shvetsiya, Bagama orollari, Butan, Chili, Namibiya va Serra-Leone vakillaridan iborat to‘qqiz aʼzosi bu haqda qaror qabul qilishi lozim.
Eslatib o‘tamiz, avvalroq “Tolibon” barcha vazir o‘rinbosarlari tarkibini eʼlon qilgani hamda Zabihullo Mujohid “Tolibon” ayollar taʼlimiga qarshi emasligi haqida xabar berilgandi.
Nasiba To‘xtayeva
