Ahmad Masʼud Rossiya bilan aloqa o‘rnatmoqchi
Ahmad Masʼud kuchlari Rossiya bilan aloqa o‘rnatmoqda. Bu haqda "Afg‘oniston milliy kongressi partiyasi" yetakchisi Abdullatif Pedram maʼlum qilgan.
Taʼkidlanishicha, Pedram Ahmad Masʼud va sobiq vitse-prezident Amrulla Solih bilan birga Tojikistondan siyosiy boshpana olgan. "Biz "Tolibon"ga qarshilikni bir oy ichida rasman eʼlon qilamiz", — degan Pedram. Uning so‘zlariga ko‘ra, qarshilik harakati hozirda badavlat afg‘onlar tomonidan moliyalashtirilmoqda. Lekin harakat Rossiya tomonidan qo‘llab-quvvatlanishiga ham umid qilyapti. Pedram hozirda qarshilik kuchlari Moskva bilan "vazirlar darajasidan tashqarida" aloqa o‘rnatganligini aytgan. Shuningdek, Tojikiston Prezidenti Emomali Rahmon Putin bilan bo‘lajak uchrashuvida afg‘on qarshilik kuchlari masalasini muhokama qilishi mumkinligi aytilmoqda.
Panjsher 6-sentabr kuni toliblar tomonidan egallangan. Ammo qarshilik kuchlari rahbari Ahmad Masʼud kurash davom etishini eʼlon qilgan.
Bundan avval AQSH nima uchun Afg‘onistonni tark etgani hamda "Tolibon" yadro qurolini qo‘lga kiritishi mumkinligi xabar qilingandi.
Jahongir Qo'ziyev
