АҚШ қўшинларини Афғонистондан нима учун олиб чиққани очиқланди
Оқ Уй матбуот котиби Жен Псаки АҚШ қўшинлари Афғонистонда қолиши "Толибон" билан уруш келтириб чиқариши мумкин бўлганини маълум қилди.
Бу Пентагоннинг Байденга қўшинларни олиб чиқмасликни сўрагани тўғрисидаги баёнотига жавоб бўлди. Псаки ушбу масала юзасидан турли фикрлар бўлганини ҳам қўшимча қилди.
"Қўшинлар сони оширилиши ҳам доимий чора бўла олмасди. Бу, шунингдек, "Толибон" билан урушни англатарди ва эҳтимолий қурбонлар сонини оширар эди. Президент шунчаки бундай қарор қабул қилишга тайёр эмасди. У қўшинлар сонининг оширилиши америка халқи манфаатларига зид эканини яхши англаган", — деган Псаки.
У, шунингдек, қўшинлар сони оширилиши узоқ муддатли бўлмаслигини айтган. Шу билан бирга Псаки қўшинларни олиб чиқиш тўғрисидаги қарор шахсан Байденнинг ўзи томонидан қабул қилинганини таъкидлади.
Маълумот ўрнида: Вашингтон 2021 йил августи охирида Афғонистондан қўшинларини олиб чиқиб кетди. Бу АҚШ тарихидаги энг узоқ урушнинг тугашига олиб келди.
Аввалроқ "Толибон" Покистон ядро қуролларини қўлга киритиши мумкинлиги ҳамда толибларнинг ўз жангчиларига янги тақиқлар жорий этгани ҳақида хабар берилганди.
Жаҳонгир Қўзиев
