Facebook, WhatsApp va Instagramning bir soat ishlamasligi jahon iqtisodiyotiga 161 million dollar zarar yetkazdi
4 oktyabr kuni butun dunyoda internetda uzilishlar kuzatildi. Dastlab Facebook, WhatsApp va Instagramda boshlangan muammo keyinchalik Google xizmatlari, Twitter, Tiktok va Zoomga ham taʼsir qildi. Hatto Rossiyada Vkontakte va Telegramda ham uzilishlar bo‘lgani maʼlum qilindi.
Facebook, WhatsApp va Instagramning bir soat ishlamasligi jahon iqtisodiyotiga 161 million dollar zarar yetkazdi. Umuman olganda Facebook aksiyalari 5 foizga pasaydi. Oqibatda, “Ria Novosti” maʼlumotlariga ko‘ra, kompaniya asoschisi Mark Sukerberg 6 milliard dollardan ortiq boyligini yo‘qotdi. Keyinroq Sukerberg tarmoqdagi nosozliklar uchun foydalanuvchilardan uzr so‘radi.
Shuningdek, tarmoqda 1.5 milliard Facebook foydalanuvchilarining maʼlumotlari sotib yuborilgani to‘g‘risida xabarlar tarqaldi. Kompaniyaning o‘zi buni inkor qilmoqda. Ammo yuqoridagi xabarlarning o‘ziyoq ijtimoiy tarmoqqa bo‘lgan ishonchning pasayishiga sabab bo‘ldi.
Facebook uzilishlarni texnik sabablar bilan bog‘lagan. Kompaniya muhandislari muammo magistral marshrutizatorlardagi o‘zgarishlar tufayli vujudga kelganini maʼlum qildi. Ushbu uzilish ijtimoiy tarmoq tarixidagi eng uzun uzilish sifatida qoldi. Eʼtiborlisi , texnik muammolarni bartaraf etish bunchalik cho‘zilib ketganiga sabab, muammo chiqqandan so‘ng, kompaniya xodimlari ofislariga kira olmay qolgan. Chunki ofisga kirish to‘liq elektronlashtirilgan va maxsus beydjik orqali bo‘lgan. Ammo serverlardagi muammo tufayli ofisga kirishdagi elektron himoya tizimi ham ishlamagan, yaʼni xodimlarning beydjiklarini “tanimagan”.
Avvalroq Buyuk Britaniya mudofaa vaziri kiberhujumlar haqida gapirgandi.
Jahongir Qo'ziyev
