Mark Sukerberg Facebook sobiq menejeri Frensis Xauge ayblovini beʼmanilikdan boshqa narsa emas, deb atadi
Facebook rahbari Mark Sukerberg mahsulotlar bo‘yicha sobiq menejer Frensis Xaugenning platforma bolalarga zarar yetkazishi to‘g‘risidagi ayblovini rad etdi.
“Biz xavfsizlik, tinchlik va ruhiy salomatlik kabi masalalar juda muhim ekanini chuqur his qilamiz va anglaymiz”, — degan Sukerberg Facebook sahifasidagi xabarida.
Uning yozishicha, Xaugenning so‘zlari beʼmanilikdan boshqa narsa emas.
“Biz agar tadqiqotlarni inkor etsak, nega unda bu muhim savollarga javob topish uchun sohada yetakchi bo‘lgan tadqiqotlar dasturini yaratdik? Agar biz zararli kontentga qarshi kurashish haqida qayg‘urmasak, nega unda shu sohadagi boshqa har qanday kompaniyadan ko‘proq odam yolladik?”, — degan u.
Sukerberg fikrini davom ettirib “Buning ortida biz go‘yo daromadni xavfsizlik va tinchlikdan ustun qo‘yamiz, degan ayblov bor. Holbuki, bu bizga nisbatan tuhmat va yolg‘ondan boshqa narsa emas”, deb yozgan.
Maʼlumki, 4-oktabr kuni butun dunyoda internetda uzilishlar kuzatildi. Dastlab Facebook, WhatsApp va Instagramda boshlangan muammo keyinchalik Google xizmatlari, Twitter, Tiktok va Zoomga ham taʼsir qildi. Facebook, WhatsApp va Instagramning bir soat ishlamasligi jahon iqtisodiyotiga 161 million dollar zarar yetkazdi. Umuman olganda, Facebook aksiyalari 5 foizga pasaydi.
Facebook rahbari bu haqda ham yozib, hodisani “so‘nggi yillardagi eng yomon o‘chish”, deb baholadi. U kompaniya so‘nggi 24 soatini o‘z tizimlarini kuchaytirish haqida fikr yuritishga sarf qilganini taʼkidladi.
Sharofat Mahmudova
