Metroda begona qizni himoya qilgan yigit ayovsiz kaltaklandi
Kuni kecha ijtimoiy tarmoqlarda Moskva metrosida uchta yo‘lovchi bir erkakni ayovsiz kaltaklayotgani aks etgan videolavha tarqaldi.
Bu haqda Daily Storm sayti ham xabar qildi.
Guvohlar bergan maʼlumotga ko‘ra, Romana Kovalyovning kaltaklanishiga 3 nafar bezori yo‘lovchi notanish qizni haqorat qilayotgani sabab bo‘lgan. Roman Kovalyov jamoat joyda noo‘rin harakatlar sodir etayotgan yigitlarni tartibga chaqirib, o‘zlarini kamtar tutishlarini so‘ragan. Bu tanbeh yigitlarga yoqmagan. Buning oqibatida katta janjal yuzaga kelib, Roman ayovsiz kaltaklangan. Yigitning boshi, yuz va jag‘ qismi sinishi, ichki organlarning ezilishi, tananing turli qismlarida ko‘karish alomatlari bilan kasalxonaga yotqizilgan.
Huquq -tartibot xodimlari qoidabuzarlarni 2 soat ichida qo‘lga oldi. Surishtiruv jarayonida ular Moskvaga ishlash uchun kelgan dog‘istonlik fuqarolar ekanligi maʼlum bo‘ldi. Hozirda politsiya tomonidan janjal ko‘targan fuqarolarga jinoiy ish ochilgan.
Roman Kavalyov «Zvezda» TVga bergan intervyusida, bezorilarning to‘xtovsiz zarbasidan hushini yo‘qotganini, kasalxonaga qanday qilib borib qolganini eslay olmasligini bildirgan.
- Bosh va yuz qismimda hali ham shishlar bor. Shifokorlarning aytishicha, shishlar qaytgach, qayta tomografiya qilinib muolaja buyurilar ekan. Eng achinarlisi, ko‘zim yaxshi ko‘rmayapti. Shifokorlar asta-sekin tiklanadi, deb menga taskin berishmoqda. Boshimda juda ko‘p shishlar bor. Tikilgan jarohatlar og‘riq beryapti. Biroq shunga qaramay o‘zim himoya qilgan qizning ota-onasi bilan uchrashish uchun bordim, — deydi Roman Kavalyov.
Dog‘istonning milliy siyosat va diniy ishlar bo‘yicha vaziri Enrik Muslimov mazkur holat yuzasidan munosabat bildirar ekan “bunday hatti-harakatlar respublika yoshlarini obro‘sizlantiradi, ularning nafaqat o‘zi, balki oilalari nomiga ham dog‘ tushiradi”, — deb aytgan.
Bundan avval Moskvada hijobli ayolni ko‘rikdan o‘tkazgan shifokor kaltaklangani hamda Toshkentda dzyudochi Kamoliddin Rasulov boshqa sportchi tomonidan pichoqlab, o‘ldirilgani haqida xabar berilgan edi.
Munojat Valiyeva
