O‘zbekistonda aholi soni 35 milliondan oshdi
O‘zbekistonda doimiy aholi soni 2 foizga ko‘payib, 35 milliondan oshdi. Bu haqda Davlat statistika qo‘mitasi xabar berdi.
Qayd etilishicha, 2021-yilning 1-oktabr holatiga respublikaning doimiy aholisi soni 35 million 79,2 ming kishini tashkil etmoqda. Doimiy aholi soni o‘tgan yilning mos davriga nisbatan 2 foizga oshgan.
Taʼkidlanishicha, respublikaning doimiy aholisi so‘nggi 30 yil ichida 13,9 million kishiga oshgan.
Maʼlumot uchun, O‘zbekiston Respublikasining doimiy aholisi soni 2020-yil 1-aprel holatiga ko‘ra 34,03 mln kishini tashkil etgan.
Respublika hududlari kesimida tahlillar shuni ko‘rsatmoqdaki, 2020-yil 1-aprel holatiga ko‘ra, hududlarning respublika jami aholisi sonidagi ulushi bo‘yicha eng ko‘p ko‘rsatkich Samarqand viloyatida 11,4 foizni tashkil etib, keyingi o‘rinlarda Farg‘ona viloyatida 11,1 foizni, Qashqadaryo viloyatida 9,7 foizni va Andijon viloyatida 9,2 foizni tashkil etgan.
Dastlabki maʼlumotlarga asosan, 2020-yil 1-aprel holatiga ko‘ra respublika doimiy aholisi sonining 30,8 foizi mehnatga layoqatli yoshdan kichiklar, 58,7 foizi mehnatga layoqatli yoshdagilar va 10,5 foizi mehnatga layoqatli yoshdan kattalar hissasiga to‘g‘ri kelmoqda.
Eslatib o‘tamiz, Davlat statistika qo‘mitasining mamlakatdagi demografik vaziyat haqidagi hisobotida O‘zbekistonning doimiy aholisi soni 2021-yil 1-iyul holatiga ko‘ra 34,86 million kishini tashkil etib, yil boshidan 301,3 ming kishiga yoki 0,9% ga ko‘paydi.
Avvalroq O‘zbekistonning doimiy aholisi soni maʼlum qilingani haqida xabar berilgandi.
