Jurnalistlar Nobel mukofoti bilan taqdirlandi
"Novoy gazeti" bosh muharriri Dmitriy Muratov va filippinlik jurnalist Mariya Ressa "Demokratiya va tinchlik uchun zarur bo‘lgan so‘z erkinligini himoya qilishdagi saʼy-harakatlari uchun" Nobel mukofoti bilan taqdirlandi.
Norvegiya Nobel qo‘mitasi rahbari Berit Reiss-Andersenning taʼkidlashicha, "Novoy gazeti" (1993-yil) tashkil etilganidan buyon korrupsiya, politsiya zo‘ravonligi, noqonuniy hibsga olishlar, saylovlarni manipulyatsiya qilish kabi mavzularda tanqidiy maqolalar eʼlon qilgan. Buning uchun gazeta tahdid, zo‘ravonlik va qotilliklarga duch kelgan.
“Gazeta tashkil etilganidan buyon uning olti jurnalisti, jumladan, Checheniston urushi haqida yozgan Anna Politkovskaya o‘ldirilgan. Qotillik va tahdidlarga qaramay, bosh muharrir Muratov mustaqillik tamoyilidan voz kechmadi va jurnalistlarning tanlangan mavzularda yozish huquqini izchil himoya qildi”, — dedi Reiss-Andersen.
Mariya Ressa esa CNNning Osiyodagi muxbiri. U so‘z erkinligini targ‘ib qilish bo‘yicha ko‘plab xalqaro tashabbuslarda qatnashgan. So‘nggi yillarda unga nisbatan tergov jurnalistikasi va uning Rappler veb-sayti rahbari lavozimidagi faoliyati bilan bog‘liq bir qancha jinoiy ishlar qo‘zg‘atildi.
Bundan avval Jorjio Parizi, Klaus Hasselman va Syukuro Manabe fizika bo‘yicha 2021-yilgi Nobel mukofoti sovrindorlari deb eʼlon qilingani hamda Nobel mukofoti sovrindorlari bu yil ham uylarida taqdirlanishi haqida xabar berilgandi.
Nasiba To‘xtayeva
