Dollar xalqaro zaxira valyutasi maqomini yo‘qotishi mumkin — Jannet Yellen
Kongress davlat qarzi chegarasi bo‘yicha kelishuvga erishmasa, Vashingtonni moliyaviy inqiroz kutadi. Bu haqda AQSH moliya vaziri Jannet Yellen maʼlum qildi.
“Bizning eng asosiy vazifamiz — davlat qarzi chegarasini kengaytirish”, – degan u. Vazirning fikricha, bu eng avvalo Kongress tashabbuslarini amalga oshirish uchun zarur. Ushbu masala yuzasidan kelishuvga erishmaslik, o‘z navbatida, ijtimoiy to‘lovlar to‘lanishining kechikishiga olib kelishi qayd etildi.
“Moliya vazirligining qimmatli qog‘ozlari – jahondagi eng ishonchli aktivning obro‘siga putur yetadi, shuningdek, dollar xalqaro rezerv valyuta maqomini yo‘qotadi”, — degan Yellen.
Shuningdek, kelishuvga erishmaslik – moliyaviy inqirozga va halokatga olib kelishi taʼkidlandi. 7-oktabr kuni AQSH Senati qo‘shimcha 480 milliard dollar qarz olishga ruxsat berdi. Bu hukumatning 3 dekabrgacha bo‘lgan xarajatlarini qoplashga imkon beradi.
Bundan avval AQSHni texnik defolt kutayotgani xabar qilingandi.
Jahongir Qo'ziyev
