Ukraina portlari giyohvand moddalar savdosida tranzit vazifasini o‘tayapti — Vladimir Kolokoltsev
Rossiya ichki ishlar vaziri Vladimir Kolokoltsev Ukrainaning “giyohvandlashuv” jarayonidan xavotirda ekanini bildirdi. Bu haqda vazirlik rasmiy vakili Irina Volk xabar berdi.
Kolokoltsev bu to‘g‘risida MDHga aʼzo davlatlar ichki ishlar vazirlari kengashida aytib o‘tgan. “Rossiya vazirining so‘zlariga ko‘ra, terrorizm va ekstremizm bilan birga, afg‘on masalasida anʼanaviy taʼsirga ega bo‘lgan giyohvand moddalar bilan bog‘liq jinoyatlarga ham eʼtibor qaratish lozim. Shu o‘rinda, Ukraina portlarining Afg‘oniston giyohvand moddalari savdosida tranzit vazifasini o‘tayotgani alohida taʼkidlandi. Uning hududida esa katta miqdorda sintetik narkotiklar tayyorlanayotgani maʼlum qilindi”, — degan Irina Volk.
Maʼlumot o‘rnida: Afg‘onistonda jahondagi opiyning 90 foizi yetishtiriladi. Mamlakatda siyosiy vaziyatning beqarorlashuvi ortidan narkotrafik hajmining ortishi xavfi mavjud.
Bundan avval “Tolibon” Rossiyani narkotrafikka qarshi kurashga chaqirgani hamda Hindistonda Afg‘onistondan kirib kelgan uch tonna giyohvand moddalar topilgani xabar qilingandi.
Jahongir Qo'ziyev
