Hind jurnali O‘zbekistondagi taʼlim va ilm-fan integratsiyasini eʼtirof etdi
Hindistonning "The Diplomatist" jurnalida "O‘zbekistonda taʼlim va ilm-fan integratsiyasi borasida erishilgan muvaffaqiyatlar" sarlavhali maqola chop etildi. Bu haqda “Dunyo” AA xabar bermoqda.
Qayd etilishicha, O‘zbekiston Innovatsion rivojlanish vazirligi maʼlumotlari asosida tayyorlangan ushbu maqolada yurtimizda ilm-fan sohasini rivojlantirish, ushbu yo‘nalishdagi o‘zgarishlar hamda islohotlarning mazmun-mohiyati atroflicha bayon qilingan.
"O‘zbekistonda ilm-fan va taʼlim o‘rtasidagi integratsiyani taʼminlash maqsadida o‘tgan 2020 yilda Fanlar akademiyasining 65 nafar akademiklari respublikaning akademik litseylari, kasb-hunar kollejlari, oliy taʼlim muassasalari va xo‘jalik tashkilotlariga biriktirildi, — deb yozadi nashr. — Bunday faoliyat taʼlim jarayoniga olimlarni jalb etish bilan birgalikda, ilmni yoshartirish hamda ilmni omma uchun keng targ‘ib qilish uchun bosqichma-bosqich erishishni ham nazarda tutadi".
Hind jurnalining taʼriflashicha, mamlakatda eng muhim hodisalardan yana biri — ilmiy va ilmiy-pedagog kadrlarning ijtimoiy maqomini yuksaltirish yo‘lida ham moddiy rag‘bat, ham targ‘ibot ishlari yo‘lga qo‘yilgan.
Taʼkidlanishicha, "O‘zbekistonda o‘tgan uch yil ichida 3 mingdan ortiq o‘zbekistonlik yoshlar nufuzli xalqaro universitetlarda tahsil olib qaytdi. Bu, o‘z navbatida, O‘zbekistonda ilm-fan kelajagi ishonchli qo‘llarda ekanligidan dalolatdir", — deb yozadi "The Diplomatist".
Avvalroq "The Korea Herald" gazetasi O‘zbekistondagi muhim tadbirlarni o‘z sahifalarida keng yoritishi hamda Turkiyada nashr etiladigan “Yazar” gazetasi sahifasida “Har bir inson ko‘rishi kerak bo‘lgan mamlakat: Beruniy, Naqshbandiy, Buxoriy va Termiziyning diyori – O‘ZBEKISTON” sarlavhali maqola chop etilgani haqida xabar berilgandi.
