"The Korea Herald" газетаси Ўзбекистондаги муҳим тадбирларни ўз саҳифаларида кенг ёритади

 

Таъкидланишича, мулоқот чоғида ўзаро ҳамкорликни фаоллаштиришга, жорий йил юртимизда бўлиб ўтадиган муҳим тадбирларни, шу жумладан, Президент сайловини ўтказиш жараёни билан боғлиқ матбуот хабарларини ушбу нуфузли газетанинг саҳифаларида ёритиб боришга келишиб олинди.

 

Чой Жин Ёнгнинг қайд этишича, сўнгги йилларда Ўзбекистон ўзининг минтақадаги ҳамда халқаро миқёсдаги ўрнини тобора мустаҳкамламоқда.

 

"Мамлакатингизда рўй бераётган ўзгаришларнинг асосий моҳияти “инсон манфаатлари ҳамма нарсадан устун”, деган тамойил билан изоҳланади. Энг эътиборли томони, Президент Шавкат Мирзиёев ёшларнинг илм ўрганиши, хорижий тилларни мукаммал эгаллаши, бунинг учун зарур шароитларни яратишга ниҳоятда жиддий масала сифатида қарамоқда. Дарҳақиқат, дунё шитоб билан ўзгараётган, барқарорликка янгидан-янги хавф-хатар ҳамда таҳдидлар пайдо бўлаётган ҳозирги шароитда илм-маърифат масаласи ўз долзарблигини намоён этмоқда. Айнан ана шу йўналиш халқлар фаровонлигининг калити бўлиб, у инсониятни тинчлик, эзгулик ва бағрикенгликка етаклайди",  — деди Чой Жин Ёнг.

 

Мулоқот давомида истиқболда самарали алоқаларни ривожлантириш мақсадида "The Korea Herald" газетаси билан элчихона ўртасида ҳамкорлик меморандуми имзоланди.

 

Эслатиб ўтамиз, Ўмон Султонлигининг "Asdaa Oman" газетасида "Сайловолди тайёргарлик ишлари якунлангач, 24 октябрь куни Ўзбекистонда Президент сайловлари ўтказилади" сарлавҳали мақола чоп этилганди.

 

Аввалроқ сайлов бюллетенининг шакли ва матни тасдиқлангани, Президент сайлови жараёнларига Ички ишлар вазирлиги ва Миллий гвардия ходимлари жалб этилгани, сайлов бюллетенларини Брайль алифбосида тайёрлаш таклиф қилингани, МСК раиси ўринбосари Баҳром Қўчқоров президент сайловларида қатнашадиган номзодларга нисбатан қонунчиликда белгиланган талабларда ўзгариш йўқлиги хабар қилинганди. Бундан ташқари, Ўзбекистонда коронавирусдан даволанаётганлар президент сайловида қандай иштирок этиши ҳамда Қорақалпоғистон Республикаси, вилоятлар ва Тошкент шаҳри ҳудудларида Ўзбекистон Республикаси Президенти сайловини ўтказиш учун 14 та сайлов округи тузиш тўғрисида қарор қабул қилингани ҳақида хабар берилганди.