Nazarboyev Donishmandlar Kengashi rahbari lavozimiga tayinlanishi mumkin
Qozog‘iston prezidenti Qosim-Jomart Toqayev mamlakatning birinchi prezidenti Nursulton Nazarboyevni Osiyoda o‘zaro hamkorlik va ishonch choralari konferensiyasi Donishmandlar kengashi rahbari lavozimiga taklif qildi. Bu haqda Qozog‘iston tashqi ishlar vaziri o‘rinbosari Akan Rahmetullin aytib o‘tdi.
Seshanba kuni Nur-Sultonda Osiyoda hamkorlik va ishonch choralari bo‘yicha Kengashga aʼzo mamlakatlar tashqi ishlar vazirlarining VI yig‘ilishi bo‘lib o‘tdi.
Qozog‘iston YEXHT va MXHM salohiyatini birlashtirishni taklif qilmoqda.
Uchrashuvda Rahmetullin shunday deydi:
“Bugun biz Donishmandlar Kengashi to‘g‘risidagi nizomni tasdiqlaymiz. Ertalab biz bilan bo‘lgan uchrashuvda, prezident Qosim-Jomart Toqayev Osiyoda hamkorlik va ishonch choralari bo‘yicha Kengash asoschisi janob Nazarboyevni Donishmandlar kengashi rahbarligiga taklif qildi. Umid qilamanki, siz bu nomzodni maʼqullaysiz”.
Maʼlumot o‘rnida, tashkilotning Donishmandlar Kengashi ishonch choralarini kuchaytirishning turli yo‘nalishlari bo‘yicha hamkorlikni faollashtirish uchun tavsiyanomalar ishlab chiqish maqsadida tuzilgan.
Osiyoda hamkorlik va ishonch choralari bo‘yicha Kengash - mintaqaviy muammolarni muhokama qilish va amaliy hamkorlikni rivojlantirish uchun umumiy Osiyo muloqot platformasi hisoblanadi. U 1992 yilda Qozog‘iston tashabbusi bilan tashkil etilgan bo‘lib, faoliyati Osiyoda xavfsizlikni taʼminlash sohasida muloqot qilish, qarorlar qabul qilish hamda chora-tadbirlarni amalga oshirish uchun sharoit yaratishga qaratilgan. Aʼzolari esa mintaqaning 27 ta hududida joylashgan. Unda 8 ta mamlakat va 5 ta Xalqaro tashkilot kuzatuvchi sifatida qatnashadi.
Eslatib o‘tamiz, avvalroq Qosim-Jo‘mart Toqayev Qozog‘iston “Tolibon” bilan ishchi aloqalar o‘rnatishga tayyorligi haqida xabar berilgan edi.
Cho‘lponoy Ahmedova
