Қосим-Жўмарт Тўқаев: “Қозоғистон “Толибон”билан ишчи алоқалар ўрнатишга тайёр”
Қозоғистон Президенти Қосим-Жўмарт Тўқаев чет давлатлар элчиларидан ишонч ёрлиқларини қабул қилиш маросимида Қозоғистоннинг Афғонистондаги вазият билан боғлиқ позициясини баён қилди, деб хабар беради давлат раҳбари матбуот котиби Берик Уали.
“Гарчи Афғонистон билан умумий чегарамиз бўлмаса-да, Олмаотадан Кобулга самолётда атиги бир соатлик йўл. Афғонистондаги воқеалар минтақавий хавфсизлик муаммолари билан чамбарчас боғлиқ. Қозоғистон зўравонлик, гиёҳванд моддалар савдоси ва назоратсиз миграцияни олдини олиш учун ҳамкорлик қилишга тайёр”, – деди Тўқаев.
Таъкидланганидек, толиблар бирлашган, инклюзив ва вакиллик миллий ҳукуматни тузиш орқали мўътадил ва музокаралар учун очиқ жамият қура олади. Афғонистон барқарор, суверен ва бирлашган давлатга айланиши, ўзи ва қўшнилари билан тинчлик ва тотувликда яшаши керак.
Қозоғистон янги ҳокимият билан ишбилармонлик алоқаларини ўрнатишга тайёр. Халқаро ҳамжамият Афғонистонни муаммо ва қийинчиликлар гирдобига ташлаб қўймаслиги, аксинча унга ёрдам қўлини чўзиши керак.
Эслатиб ўтамиз, бундан аввал Қозоғистон Президенти “Токио — 2020” даги мамлакат спортчилари эришган натижани танқид қилган, Олмаотада Ўзбекистон фуқароси 340 доллар жаримага тортилгани ҳақида хабар берилган эди.
Акрам Хамрақулов
