Samarqandda yongan “MAN” haqida maʼlumot berildi
Samarqandga ketish yo‘lida “Fura” yuk mashinasida yong‘in chiqqani yuzasidan FVV rasmiy maʼlumot berdi.
Unda aytilishicha, 12-oktabr kuni soat 23:38 da Samarqand viloyati Bulung‘ur tumani “Olmazor” MFYdan o‘tgan M-39 yo‘lining 1048 km.da harakatlanayotgan “MAN” rusumli tirkamali yuk avtomashinasida yong‘in chiqqan. Bu haqida tuman FVBga xabar kelib tushgan.
Eng yaqin yong‘in o‘chirish qism yong‘in sodir bo‘lgan manzildan taxminan 18 km. masofada joylashgani uni tezda bartaraf etishda qo‘l kelgan.
Yuz bergan muammoli vaziyatni hal qilish uchun 2 ta yong‘in-qutqaruv ekipaji voqea joyiga soat 00:01 da yetib borgan. Soat 00:05 da yong‘in qurshab olingan va soat 01:12 da o‘chirilgan.
Yong‘in oqibatida yuk avtomashinasining tirkamasiga yuklangan taxminan 25 tonna polietilen rulonlar yonib, zararlangan. Halok bo‘lgan va jabrlanganlar yo‘q.
Hozirda yong‘in sababi va yetkazilgan moddiy zarar miqdori aniqlanmoqda.
Bundan avval Jizzaxda yuk mashinasi, Toshkentda yo‘lovchi tashuvchi “Gazel” hamda Qoraqalpog‘istonda stansiyada turgan vagon yonib ketgani haqida xabar berilgandi.
Olamgir Abdiyev
