35 yil temir bochka ichida yashagan ayol qariyalar uyiga borishni rad etdi
Maʼlum bo‘lishicha, 64 yoshli omsklik ayol 35 yil zanglagan bochkada suvsiz, isitishsiz va yorug‘liksiz yashagan. Ayol harbiy zavodda kran operatori bo‘lib ishlagan va uy uchun navbat kutgan.
Shuningdek, 1986-yilda kasaba uyushmasi qo‘mitasi xonalar sonini qisqartirish maqsadida unga yotoqxonadan bochkaga o‘tishni tavsiya qiladi. Keyinchalik zavod yopiladi va hech qanday uy-joy berilmaydi.
Ushbu holat bo‘yicha, Rossiya Federatsiyasi Tergov qo‘mitasi raisi Aleksandr Bastrikin aniqlik kiritishni topshirdi.
Rossiya Federatsiyasi Tergov qo‘mitasining Omsk viloyati bo‘yicha tergov bo‘limi boshlig‘i Oleg Yevgeniyevich Vinnikov Omsk “RIA Novosti” agentligi vakiliga vaziyatdan xabardor ekanini aytdi.
Uning so‘zlariga ko‘ra, maʼmuriyat mutaxassislari aprel, sentabr va oktabr oylarida unga bir necha bor gerontologik (Qariyalar uyi) markaziga ko‘chishni taklif qildi. Ammo ayol taklifni rad etgan.
Shu bilan birga, yaqin bir oy ichida ayolga qariyalar uyiga ro‘yxatdan o‘tishga xat yuborilgan. Ammo ayol qo‘lda yozilgan rad javobi nusxasini maʼmuriyatga yubordi.
Maʼlumot o‘rnida: 28-sentabr kuni iqtisodiy masalalarga bag‘ishlangan yig‘ilishda Rossiya prezidenti Vladimir Putin ruslarni favqulodda uylardan ko‘chirishni tezlashtirishga chaqirdi.
Bundan avval Rossiyaning Ulyanovsk viloyatidagi uylardan birida besh va uch yoshli bolalar bir necha kun yolg‘iz qolgani aniqlangandi.
Cho‘lponoy Ahmedova
