Italiyada soxta COVID sertifikatlarini tayyorlagan Telegram kanallari yopildi
Sitsiliya Kataniya provinsiyasi prokuraturasi “Telegram” messenjerida soxta COVID sertifikatlarini sotib olishni taklif qilgan ikkita kanalni yopdi. Soxta sertifikatlar 250 yevro evaziga berilgan. Bu haqda “Ria Novosti” xabar berdi.
Italiya politsiyasi mazkur qalloblik yuzasidan tergov harakatlari olib bordi. Huquqni muhofaza qilish organlari ikkala kanal ham kriptovalyutada 250 yevroga soxta sertifikat taklif qilganini aniqladi. Buning oqibatida “Green Bypass 2.0” va “Authentic Green Pass Sale” deb nomlangan kanallar yopildi.
Maʼlumot uchun: COVID sertifikati Italiyada hukumat qaroriga muvofiq avgust oyida joriy etilgan, 15 oktyabrdan kuchga kirgan. Qarorga ko‘ra, sertifikat davlat idoralari, xususiy ishlab chiqarish va ofislarga kirish uchun majburiy taqdim etiladi.
Eslatib o‘tamiz, bundan avval Hindistonda soxta vaksina bilan emlangan shifokorlar qo‘lga olingani va ijtimoiy sahifasida Afg‘onistonda qolib ketganini aytgan britaniyalik talabaning akkaunti bloklangani haqida xabar berilgandi.
Cho‘lponoy Ahmedova
