Davlat rahbarining ko‘krak nishoni va shtandarti joriy qilinadi
Bugun, 18-oktabr kuni Oliy Majlis Qonunchilik palatasining navbatdagi majlisi bo‘lib o‘tmoqda. Majlisda “O‘zbekiston Prezidenti faoliyatining asosiy kafolatlari to‘g‘risida”gi qonunga qo‘shimcha kiritish haqida”gi qonun loyihasi muhokama qilindi.
Adliya vazirligi jamoatchilik bilan aloqalar bo‘limining xabar berishicha, qonun loyihasini deputatlarga Аdliya vaziri Ruslanbek Davletov taqdim qildi.
Qayd etilishicha, qonun loyihasi bilan O‘zbekiston Respublikasi Prezidentining farqlovchi belgilari, yaʼni ko‘krak nishoni va shtandarti (bayrog‘i) yuzasidan qoidalar kiritilmoqda.
Xorijiy davlatlarda davlat rahbarining ko‘krak nishoni va shtandarti yangi saylangan Prezidentga qasamyod qabul qilgandan keyin topshirilishi belgilangan. O‘zbekiston Respublikasi qonunchiligida ushbu masalalar tartibga solinmaganligi bois, qonunchilikni tegishli mazmundagi norma bilan to‘ldirish taklif etilmoqda.
Mazkur tartib lavozimga saylangan shaxsni prezidentlik lavozimiga yuklatilgan murakkab vazifalarni samarali amalga oshirishiga xalq va jamiyat tomonidan bildirilgan ishonch belgisi sifatida xizmat qilishi taʼkidlandi.
Avvalroq O‘zbekistonda “Yangi O‘zbekiston islohotchisi” ko‘krak nishoni taʼsis etilishi hamda chempion sportchilarning ota-onalari "Mehnat faxriysi" ko‘krak nishoni bilan taqdirlangani haqida xabar berilgandi.
Shirin Xolmatova
