“O‘zgidromet” dam olish kunlari qanday ob-havo kuzatilishini maʼlum qildi
Gidrometeorologiya xizmati kelayotgan dam olish kunlari uchun ob-havo maʼlumotini eʼlon qildi.
Qayd etilishicha, kecha kunduzi mamlakatimiz hududiga Kavkaz hududlari ustida shakllangan nam va sovuq havo massalari kirib keldi. Respublika bo‘yicha yomg‘ir yog‘di, tog‘li hududlarda yog‘ingarchilik (yomg‘ir, qor) kuzatildi. Baʼzi joylarda yog‘ingarchilik kuchli bo‘ldi. Kunduz kungi havo harorati 10-12 darajaga pasaydi.
Bugun respublika hududining katta qismida quruq va sovuq ob-havo bo‘lishi kutilmoqda. Harorat 8-13 daraja iliqni tashkil etadi, bu oktabr oyining oxirgi o‘n kunligi uchun bo‘lgan iqlimiy meʼyorlardan 8-10 darajaga pastdir.
Faqat Farg‘ona vodiysi viloyatlari bo‘yicha va respublika tog‘li hududlarining baʼzi joylarida yog‘ingarchilik ehtimoli saqlanib turadi. Ayrim tog‘li hududlarda yog‘ingarchilik kuchli bo‘lishi mumkin.
Dam olish kunlari barcha hududlarda quyoshli, lekin salqin ob-havo bo‘lishi kutilmoqda. Ushbu kunlarda harorat meʼyordan past bo‘ladi. Ertaga kechasi havo harorati 2 daraja sovuq - 3 daraja iliqni tashkil etadi, kunduz kuni 11-16 daraja iliqdan oshmaydi. Yakshanba kuni havo biroz iliq bo‘ladi, kechasi 0-5 daraja iliq, baʼzi joylarda 2 daraja sovuqqacha, kunduz kuni 13-18 daraja iliq bo‘ladi.
Eslatib o‘tamiz, avvalroq O‘zbekistonga Eron hududlaridan quruq va issiq havo oqimi kirib kelishi hamda kelgusi o‘n yilliklarda insoniyat yana-da kuchli issiqlik to‘lqinlariga duch kelishi haqida xabar berilgandi.
