Кўчада ҳаракатланманг, машиналарни хавфсиз жойга қўйинг- Ўзгидромет
Хабарингиз бор, 24-26 июль кунлари Ўзбекистонга Эрон ҳудудларидан қуруқ ва иссиқ ҳаво оқими кириб келди.
Шу боис юртимизда об-ҳаво янада исиди. Аммо бугун ижтимоий тармоқларда Қашқадарё ва Самарқанднинг айрим ҳудудларида кучли шамол бўлиб, чанг ва қум бўронлари кўтарилгани акс этган видеолар тарқалди. Бу қанчалик асосли? Юртимизда эртага қандай об-ҳаво ҳукм суради? Ушбу саволларга жавоб олиш мақсадида Ўзгидромет мутахассиси Эркин Абдулахатов билан боғландик:
— Сўнгги пайтларда дунёда иқлим ўзгариши туфайли, яъни атмосферадаги нотабиийлик кучайиб кетгани боис, табиий офатлар сони кўпайиб бормоқда. Ҳозирда дунё океанида тропик циклонларнинг фаоллиги кучайган. Биргина ўтган йилнинг ўзида Атлантика океанида рекорд даражада кўп тропик циклонлар кузатилди. Куни кеча Хитойга мамлакатнинг шарқий қисмидан, яъни Тинч океани ҳудудидан “Ин-Фа” (тайфун) тропик циклони кириб келди. Бу Шанхай ҳудудларида кучли ёғингарчилик, шамол ва бўронларни келтириб чиқарган. Ундан ташқари, Хитойнинг марказий қисмларида муссон оқимлари ривожланган. У кучли ёғингарчилик, сел ва сув тошқинларига сабаб бўляпти. Ижтимоий тармоқларда тарқалган Хитойдаги ҳолат ёлғон хабарлар эмас. Улар мамлакат ҳудудида шу кунларда ҳақиқатда содир бўлган. Географик шароитдан келиб чиқадиган бўлсак, бу каби табиий офатларларни келтириб чиқарувчи ҳаво оқимлари тўғридан-тўғри Ўзбекистон ҳудудига кириб келмайди. Лекин Ўзбектистонга баъзида кириб келувчи совуқ Сибир антициклони ривожланишида маълум таъмирларни келтириб чиқаради.
26-27 июль кунлари юртимизда кучли шамол ва чанг бўронлари кузатилиши ҳақида Ўзгидромет аввалдан аҳолини хабардор қилмоқда. Ҳозир бизда жазирама иссиқ давом этмоқда. Бу юртимизда паст ҳаво оқимини юзага келтирди. Бугун бунинг гувоҳи бўлдик: воҳа ҳудудларида кучли шамол, чанг ва қум бўронлари содир бўлди. Бу ҳодиса эртага ҳам давом этади. Бунга сабаб айни кунларда Қозоғистоннинг шимолий ҳудудларида антициклон ўтмоқда. Бугунги чанг бўронлар антициклон таъсиридир. Саратон иссиғи ва қурғоқчилик авж олган паллада ер сиртидаги тупроқнинг хусусиятлари жуда мўрт бўлиб қолади. Чанг ва қум бўронларининг хавфлилиги йил давомида, айниқса, воҳа томонларда йилига 25-26 маротаба содир бўлади. Унинг давомийлиги 3 соатдан ошмайди.
Фавқулодда вазиятлар вазирлиги ва ҳокимиятлар фуқаролардан кучли шамол кузатилганда кўчада ҳаракатланмаслик, автомобилларни дарахтлар ва бошқа турли мустаҳкам бўлмаган конструкциялардан узоқроқ, хавфсиз жойга қўйишни сўрайди.
Баҳринисо МАДУАМРОВА
