"O‘zbekiston madaniy merosi jahon to‘plamlarida" loyihasi 5 yildan buyon amalda
Bugun, 23 oktyabr kuni Xalqaro media-xollda "O‘zbekiston madaniy merosi jahon to‘plamlarida" loyihasining 5 yillik faoliyatiga bag‘ishlangan tadbir bo‘lib o‘tdi. Unda davlat va jamoat arboblari, xorijiy davlatlar elchilari, olimlar va ekspertlar ishtirok etdi.
Tadbirda so‘zga chiqqan O‘zbekiston Fanlar akademiyasi akademigi, Oliy Majlis Qonunchilik Palatasi Spikeri birinchi o‘rinbosari Akmal Saidov ushbu loyiha ulkan ahamiyatga ega ekanini taʼkidladi. “To‘plamlar ham ilmiy, ham tarbiyaviy ahamiyatga ega. Shuningdek, xollda "O‘zbekiston madaniy merosi jahon to‘plamlarida" loyihasi O‘zbekistonning tashqi siyosiy imidjini yaxshilashga xizmat qiladi”, – deb fikr bildirdi u.
“Ushbu muhim tadbirda ishtirok etayotganimdan xursandman va "O‘zbekiston madaniy merosi jahon to‘plamlarida" loyihasi faoliyatini yuqori baholayman. Bu loyiha dunyo miqyosida keng tarqatilishi kerak. Endilikda kitob-albomlar bizning vakolatxonamizni ham bezaydi hamda O‘zbekistonning o‘ta boy va qadimiy tarixi hamda madaniyatining yaqqol namunasi bo‘ladi”, — dedi YUNESKOning O‘zbekistondagi vakolatxonasi rahbari Aleksandros Makarigakis.
“Eriell Group” kompaniyasi raisining madaniy-gumanitar masalalar bo‘yicha maslahatchisi Yusuf Abdullayev ham kirish so‘zida ushbu loyihaning naqadar muhimligini qayd etdi. Uning fikricha, "O‘zbekiston madaniy merosi jahon to‘plamlarida" loyihasi respublikadagi ilm—fan rivojiga ulkan hissa qo‘shmoqda. “ Shu o‘rinda Benjamin Franklinning 200 yil burun aytgan fikri o‘rinli : ‘Taʼlimga kiritilgan investitsiya eng maqbul investitsiya”, – dedi Yusuf Abdullayev.
O‘zbekiston madaniy merosini o‘rganish, saqlash va ommalashtirish bo‘yicha Butunjahon jamiyati raisi Firdavs Abduxalikkov loyiha jahonning turli davlatlaridan ko‘plab olimlarni jamlaganini taʼkidladi.
“Dunyoning o‘nlab davlatlariga sochilib ketgan madaniy merosimizni to‘plash maqsadida 400 ga yaqin olimlarni jamladik”, – deb qayd etdi jamiyat raisi.
Tadbir davomida O‘zbekistonning 70 dan ortiq muzeylariga 35 tomlik kitoblar jamlanmasi taqdim etildi. Bundan avval Madaniy meros agentligining vazifalari belgilangani hamda YUNESKO O‘zbekistondagi ayrim obyektlarni madaniy meros ro‘yxatidan chiqarishi mumkinligi xabar qilingandi.
Jahongir Qo'ziyev
