Kovid-markazlarda qancha bemor saylovlarda ishtirok etdi?
Sanitariya-epidemiologiya osoyishtalik agentligi direktori javob beradi.
24 oktyabr kuni Markaziy saylov komissiyasi matbuot markazida sanitariya-epidemiologiya osoyishtalik agentligi direktori Bahodir Yusupaliyev ishtirokida matbuot anjumani bo‘lib o‘tdi. Unda saylov jarayonida mavjud epidemiologik vaziyatni hisobga olgan holda amalga oshirilgan ishlar yuzasidan hisobot berildi.
Bahodir Yusupaliyevning maʼlum qilishicha, saylov uchastkalariga 21 mingdan ziyod tibbiyot xodimlari jalb qilingan. Butun Respublika bo‘yicha bugun 53 kishining tana harorati ko‘tarilgani aniqlandi va ular darhol izolyatsiya xonasiga olindi. Shuningdek, O‘zbekistondagi kovid-markazlarda davolanayotgan 3 mingdan ziyod saylovchilarning ham saylovda ishtiroki taʼminlandi.
Bundan tashqari 120 shifoxonada saylov uchastkalari tashkil etilib, u yerdagi bemor va tibbiyot xodimlari ovoz berishiga imkoniyat yaratildi.
Avvalroq MSK matbuot markazida Bosh prokuror ishtirokida matbuot anjumani bo‘lgani xabar qilingandi.
Jahongir Qo'ziyev
