O‘zbekiston va NATO: ikki tomonlama hamkorlikni rivojlantirish zarurligi qayd etildi
Uchrashuv davomida O‘zbekiston qurolli kuchlarida o‘tkazilayotgan tub islohotlar haqida maʼlumot berildi.
O‘zbekistonning NATO huzuridagi missiyasi rahbari Dilyor Hakimov alyansning Markaziy Osiyo va Kavkaz bo‘yicha maxsus vakili Xavyer Kolomina bilan uchrashdi. Bu haqda “Dunyo” axborot agentligi maʼlum qildi.
Suhbat davomida O‘zbekiston NATOni xavfsizlikka tahdidlarga qarshi muhim hamkor sifatida ko‘rishi taʼkidlandi. Shu bilan birga, ikki tomonlama hamkorlikni rivojlantirish zarurligi qayd etildi.
O‘zbekiston va NATO ning birgalikdagi harakatlari tufayli muloqot davom etmoqda. Uchrashuv davomida O‘zbekiston qurolli kuchlarida o‘tkazilayotgan tub islohotlar haqida maʼlumot berildi. Harbiy qurilish sohasidagi muhim yo‘nalishlardan biri harbiy-texnik hamkorlik ekani alohida taʼkidlandi.
Uchrashuv davomida NATO ning “Tinchlik yo‘lida hamkorlik” dasturida O‘zbekistonning ishtiroki va istiqboldagi rejalar muhokama qilindi.
Bundan avval NATO Rossiyaga qarshi yangi reja ishlab chiqmoqchiligi hamda Xitoy taraqqiyoti NATO uchun xavf tug‘dirmasligi xabar qilingandi.
Jahongir Qo'ziyev
