2020-yilda Yaqin Sharqda 493 ta qatl holati qayd etilgan — BMT
Eronda 2020 yilda yashirincha 250 kishi qatl qilingan. Ularning 4 nafari voyaga yetmagan jinoyatchi bolalar bo‘lgan.
"2021-yil boshidan hozirgi kunga qadar 230 ta qatl amalga oshirilgan bo‘lib, shundan 9 nafar ayol va 1 bola yashirincha qatl etilgan", — deya taʼkidladi BMTning Erondagi inson huquqlari bo‘yicha mustaqil tergovchisi Javaid Rehman.
Javaid Rehman BMT Bosh Assambleyasining inson huquqlari qo‘mitasiga Eron o‘lim jazosini “qo‘rqinchli darajada” qo‘llashda davom etayotgani va qatllar bo‘yicha rasmiy statistik maʼlumotlar yo‘q qilinayotgani haqida taʼkidlagan.
Xalqaro Amnistiya tashkiloti hisobotiga ko‘ra, 2020 yilda Yaqin Sharqdagi 493 ta qatl holatining yarmidan ko‘pi Eronda ro‘y bergan. Undan keyingi o‘rinlardan esa Misr, Iroq va Saudiya Arabistoni joy olgan.
Rehmanning taʼkidlashicha, Eron hukumati tomonidan o‘lim jazosini qo‘llash xavotirli darajada qolmoqda. Rehman o‘z hisobotida Eron o‘lim jazosini “milliy xavfsizlikni buzishda shubhali ayblovlar” bilan oqlashini, mamlakat sud tizimida kamchiliklari borligi, bu yerda hatto “eng oddiy xavfsizlik choralari ham ko‘rilmagani”ni qayd etgan.
Eslatib o‘tamiz, bundan avval Erondagi qamoqxonalarning birida mahbuslar tahqirlangani aks etgan tasvirlar tarqalgani hamda Eron yadro quroliga ega bo‘lishi mumkinligi haqida Isroil Mudofaa vaziri Benri Gans maʼlum qilgani haqida xabarlar berilgandi.
Cho‘lponoy Ahmedova
