AQSHning Afg‘onistondagi ishtirokiga oid ko‘plab maʼlumotlarni olish cheklab qo‘yildi
Bu maʼlumotlar AQSHning Afg‘onistonni tark etishiga doir to‘liqroq xulosa berishi mumkin.
AQSH hukumati idoralari, xususan Pentagon va Davlat departamenti Vashingtonning Afg‘onistondagi ishtirokiga oid ko‘plab maʼlumotlarni maxfiy saqlamoqda. Bu haqda AQSHning Afg‘onistonni tiklash masalalari bo‘yicha bosh inspektori Jon Sopko maʼlum qildi.
Sopko bu maʼlumotlar AQSH kuchlarining Afg‘onistonni tark etishi bo‘yicha to‘liqroq xulosalarga olib kelishi mumkinligini qayd etgan.
“Menimcha, avgustda yuz bergan hodisalarga (2021 yil avgustida Amerika kuchlari Afg‘onistonni tark etgan) , shuningdek, barcha xavotirli signallar haqida Pentagon va Davlat departamenti tomonidan cheklab qo‘yilgan maʼlumotlarni o‘rgansakkina to‘liq tasavvur hosil qilinishi mumkin”, – degan Sopko.
Uning so‘zlariga ko‘ra, xususan, rasmiylar afg‘on xavfsizlik kuchlarining 2015 yildagi holati haqida maʼlumotlarni maxfiylashtirgan. Sopko bu hujjatlar afg‘on kuchlarining qay darajada – haqiqiy harbiy kuchmi yoki buzilib ketishga tayyor bo‘lgan “kartadan yasalgan uycha” – bo‘lganligi to‘g‘risida xulosa berishi mumkinligini qayd etgan.
Bosh inspektor maʼlumotlarning bir qismi Afg‘oniston sobiq prezidenti Ashraf G‘ani iltimosiga ko‘ra cheklab qo‘yilganini taʼkidladi.
“Kobul qulagandan keyin AQSH davlat departamenti va boshqa organlar menga bizning internet saytimizdagi audit, inspeksiya, shuningdek, moliyaviy audit hisobotlariga kirishni cheklab turishni iltimos qildi. Ular afg‘on ittifoqchilari hayoti xavf ostida qolishdan xavotir bildirishdi”, – deb qo‘shimcha qilgan Sopko.
Ammo uning qayd etishicha, davlat departamenti aynan qaysi maʼlumotlar amerikaliklar bilan hamkorlik qilgan afg‘onlarning hayotiga xavf solishi mumkinligi haqida aniq tushuntirish bermagan. Bundan tashqari, bosh tashqi siyosiy idora hisobotlardan sobiq prezident G‘ani nomining olib tashlanishini talab qilgan.
Avvalroq AQSH Afg‘oniston yo‘nalishidagi siyosatini qayta ko‘rib chiqmoqchi ekanligi hamda Sergey Lavrov Afg‘oniston qo‘shnilariga iltimos bilan chiqqani xabar qilingandi.
Jahongir Qo'ziyev
