"Tolibon" oliy rahbari "soyadan chiqmoqda"
Xaybatullo Oxunzoda Qandahordagi madrasada nutq so‘zlagan.
“Tolibon” oliy rahbari Xaybatullo Oxunzoda ilk bor omma oldida chiqish qildi. Bu haqda Pajhwok axborot agentligiga tayanib, “TASS” xabar berdi.
Maʼlumotlarga ko‘ra, Oxunzoda Qandahor shahridagi madrasalardan birida nutq so‘zlagan. Ushbu tadbirning biror-bir darajada yoritilishi qatʼiyan taqiqlangan. Ammo ko‘p o‘tmay, ijtimoiy tarmoqlarda Oxunzodaning madrasadagi nutqi yozib olingan audioyozuv tarqalib ketgan.
Taʼkidlanishicha, toliblar oliy rahbari o‘z chiqishi davomida siyosiy mavzularga to‘xtalmagan. Nutq asosan diniy masalalarga taalluqli bo‘lgan. Pajhwok agentligi maʼlumotlariga ko‘ra, Oxunzodaning madrasada bo‘lgan payti Qandahorda xavfsizlik choralari kuchaytirilgan.
Maʼlumot o‘rnida: Xaybatullo Oxunzoda 7 oktyabr kuni “Tolibon” tomonidan Afg‘oniston oliy rahbari deb eʼlon qilindi. Ammo baʼzi ekspertlar Oxunzodani bir necha yil oldin vafot etgan deb hisoblashadi. Uning o‘zi Afg‘oniston rahbari deb eʼln qilingandan keyin ham biror marta ko‘rinish bermagan.
Avvalroq O‘zbekiston va Rossiya temiryo‘lchilari transafg‘on temiryo‘li bo‘yicha hamkorlikda ish boshlagani hamda AQSHning Afg‘onistondagi ishtirokiga oid ko‘plab maʼlumotlarni olish cheklab qo‘yilgani xabar qilingandi.
Jahongir Qo'ziyev
