Abdulaziz Komilov "НТВ" telekanalining muxolifat to‘g‘risidagi savoliga javob berdi
Tashqi ishlar vaziri chet eldagi baʼzi shaxslar O‘zbekistonni asossiz tanqid qilishiga eʼtibor qaratdi.
22-oktabr kuni O‘zbekiston tashqi ishlar vaziri Abdulaziz Komilovning bir qator OAV vakillari bilan press-konferensiyasi bo‘lib o‘tgan edi. TIV tomonidan e'lon qilingan mazkur intervyuda Komilov O'zbekistondagi saylovlar, Afg'oniston masalasi qatori muholifat mavzusi bo'yicha ham o'z qarashlarini bayon etgan. Xususan, "НТВ" telekanali jurnalisti R.Sobolning muxolfat to‘g‘risidagi savoliga quyidagicha javob bergan.
— O‘zini muxolifat deb ataydigan insonlar guruhi, siz taʼkidlaganingizdek, asosan xorijiy davlatlarda yashaydi. Ular O‘zbekistonni turli omillar: siyosiy va shaxsiy qarashlari tufayli tark etgan. Shu bilan birga, ularning aksariyati chet elda o‘zini muxolif qilib ko‘rsatishga harakat qilmoqda. Balki bu ularga maʼlum maʼnoda, xususan, moliyaviy va moddiy ko‘mak olishlariga, maʼlum statusga ega bo‘lishlariga yordam beradi. Shunday bo‘lsa-da biz ularni eshitamiz – baʼzan bu shaxslardan O‘zbekiston iqtisodiy taraqqiyoti uchun yaxshi niyatlar bilan yozilgan maktublar keladi. Ammo ko‘p hollarda ular O‘zbekistonni noxolis tanqid qiladi. Fikrimcha, bu ularning muxolif kayfiyati bilan emas, balki o‘zining shaxs sifatidagi ahamiyatini ko‘rsatishga urinishi bilan bog‘liq.
O‘zbekiston rahbari o‘z chiqishlarida bir necha bor agar ular O‘zbekistonga qaytsa va Vatanga xizmat qilishni davom ettirsa, bu insonlar fikriga quloq solinishini va qo‘llab-quvvatlanishini bildirgan. Bu ular uchun hech qanday tahdid tug‘dirmaydi. Shu sababli men bu kabi shaxslarni tizimdan tashqari muxolifat emas, balki tizimsiz va tarqoq, alohida shaxslardan iborat muxolifat deb atagan bo‘lardim. Ular o‘zaro bog‘liq emas, ko‘p hollarda ularning o‘zaro raqobatini kuzatish mumkin.
Avvalroq Abdulaziz Komilov Tehrondagi Afg‘oniston masalasiga bag‘ishlangan uchrashuvda ishtirok etgani xabar qilingandi.
