Butunjahon oziq-ovqat dasturining Maskka taklifi o‘z kuchida turibdi — BMT
Avvalroq BMT Ilon Maskni o‘z boyligining bir qismini ochlikka qarshi kurashga sarflashga chaqirgandi.
BMT bosh kotibi rasmiy vakili o'rinbosari Farxon Xak Butunjahon oziq-ovqat dasturi direktorining Ilon Maskka bergan taklifi o‘z kuchida qolishini maʼlum qildi. Bu haqda “RIA Novosti” xabar berdi.
Avvalroq BMT butunjahon oziq-ovqat dasturi direktori Devid Bizli “halokat”ning oldini olish maqsadida Maskni o‘z boyligini xayriya qilishga chaqirgandi. Uning so‘zlariga ko‘ra, insoniyatni ochlikdan asrash maqsadida SpaceX asoschisining 289 milliard dollar boyligining 2 foizi yetarli.
O‘z navbatida Ilon Mask agar 6 milliard dollar haqiqatdan ham insoniyatni qutqarsa, Tesla‘dagi aksiyalarini sotishini maʼlum qilgan.
“Butunjahon oziq-ovqat dasturi taklifi chin dildan qilingan”, – degan Farxon Xak.
Oldinroq Devid Bizli 6 milliard dollar butun insoniyatni qutqara olmasligini, ammo 42 million odamni ochlikdan asrab qolishini aytgandi. Shu bilan birga u Mask bilan uchrashishga tayyorligini maʼlum qilgan.
Bundan avval Ilon Mask dunyoning eng boy odamiga aylangani xabar qilingandi.
Jahongir Qo'ziyev
