Tekindan kelsa boylik...
Katta miqdoridagi mol-mulklarini firibgarlik yo‘li bilan qo‘lga kiritgan fuqaroga sud hukmi o‘qildi.
Firibgarlik bilan 3 marta sudlangan 32 yoshli xavfli retsedivist bo‘lgan sudlanuvchi Jo‘ra Baxtiyorov 2018-yil iyul oyida Namangan shahridagi do'konlarning birida mebel savdosi bilan shug‘ullanuvchi A.Azizovdan mebel xarid qilib, u bilan yaqindan tanishib qoladi. A.Azizov va o‘g‘lini Amerika Qo‘shma Shtatlariga jo‘natishini aytib, ishonchiga kiradi. Uni aldab, firibgarlik yo‘li bilan 6.000 AQSH dollar pullarini olgan. So‘ng pullarni o‘zini shaxsiy ehtiyoji uchun ishlatib yuborgan.
2020-yilning noyabr oyida esa B.Oqilovni aldab, o‘ziga tegishli bo‘lgan "Lasseti"si borligi, uni 9.000 AQSH dollariga sotishini aytadi. Uning oldindan 1.600 AQSH dollari, 1 million so‘m pul va 10 gramm tilla-taqinchoqlarini olib, unga mashinasini bermay, jami 2 050 AQSH dollari miqdoridagi mol-mulklarini firibgarlik yo‘li bilan qo‘lga kiritgan. Bularni o‘zining shaxsiy ehtiyojlari uchun ishlatib yuborgan.
Sud tomonlarni tinglab, jinoyat ishi hujjatlarini va sudga taqdim etilgan dalillarni atroflicha o‘rganib chiqdi. Jo‘ra Baxtiyorovni Jinoyat kodeksining 168-moddasi 3-qismi "b" bandida nazarda tutilgan jinoyatni sodir etganlikda aybli deb topib, yetkazilgan moddiy zararlarni undirish belgilandi.
Avvalroq, Navoiyda 2.000 dollar evaziga o‘qishga kiritib qo‘yishni vaʼda qilgan o‘qituvchi ushlangani hamda Faсebookda Shavkat Mirziyoyev nomi bilan soxta akkaunt ochib firibgarlik qilgan shaxs aniqlangani haqida xabar berilgandi.
Munojat Valiyeva
