Shimoliy Koreya yangi yadro qurollari ishlab chiqarish uchun yetarli uranga ega — “Reuters”
Agentlik maʼlumotlariga ko‘ra, Pxenyan yadro arsenalini kengaytirishda davom etmoqda.
Shimoliy Koreya o‘zining Pxensandagi uran boyitish zavodi orqali yangi yadro qurollarini ishlab chiqarish uchun yetarli miqdorda uranga ega bo‘lishi mumkin. Bu haqda “Reuters” agentligi xabar berdi.
2017-yilda yadro quroli sinoviga qo‘yilgan moratoriyga qaramay, Pxenyan arsenalini kengaytirishda davom etmoqda. Agentlik maʼlumotlariga ko‘ra, 2021 yilda KXDR avvalgi yillarda plutoniy ishlab chiqargan reaktorini qayta ishga tushirdi.
O‘tgan oyda Stenford universiteti tadqiqotchilari tomonidan eʼlon qilingan hisobotda Shimoliy Koreya uran ishlab chiqarish uchun yetarli imkoniyatga ega ekani maʼlum qilingandi. Unda taʼkidlanishicha, “KXDR hozirda avvalgi yillarga qaraganda ko‘proq qayta ishlash quvvatlariga ega. Bu zarur vaziyatda keragidan ham ortiq boyitilgan uran ishlab chiqarish imkonini beradi”.
Tahlilchilarning fikricha, Pxensandagi uran boyitish zavodi va u bilan bog‘liq shaxta Shimoliy Koreyada uran rudasi topilgan yagona hudud hisoblanadi.
Bundan avval Shimoliy Koreya qora oqqush go‘shti yordamida ochlikka qarshi kurashmoqchi ekani hamda Yaponiya tarafga ikki raketa uchirgani haqida xabar qilingandi.
Jahongir Qo'ziyev
