Bayden Donald Tramp yo‘l qo‘ygan xatolarni to‘g‘rilashi kerak — Xitoy TIV
Bu haqda Xitoy tashqi ishlar vazirligi rasmiy vakili Van Venbin maʼlum qildi.
Venbin Si Szinpin va Bayden o‘rtasida uchrashuvga tayyorgarlik ko‘rilayotgani to‘g‘risida Amerika OAVlarida chiqqan xabarlarga munosabat bildirar ekan, ayrim nashrlar o‘zboshimchalikka yo‘l qo‘yganini aytgan.
“Bu haqda (AQSH va Xitoy rahbarlari uchrashuvi) bizga maʼlumot kelib tushmadi. Shuni aytishim kerakki, AQSHning avvalgi administratsiyasi yo‘l qo‘ygan xatolar ikki davlat munosabatlarini jiddiy yomonlashtirdi”, – degan Venbin.
Uning qo‘shimcha qilishicha, Xitoy bunga qarshi zarur va qonuniy javob bergan. Shuningdek, u amaldagi rahbariyat Donal Tramp paytida qilingan xatolarni to‘g‘irlashiga umid bildirdi.
Bundan avval Xitoy tashqi ishlar vazirligi AQSH razvedkasining koronavirus to‘g‘risidagi hisobotiga munosabat bildirgandi.
Jahongir Qo'ziyev
