Ukraina sobiq prezidenti uyushgan jinoiy guruhga rahbarlik qilganlikda ayblanmoqda
Ushbu guruh tarkibida Ukraina sobiq harbiylari bo‘lganligi taxmin qilinmoqda.
Ukraina surishtiruv byurosi mamlakat sobiq prezidenti Viktor Yanukovichni uyushgan jinoiy guruh tuzishda aybladi. Bu haqda “Ria Novosti” xabar berdi.
“2021 yil 5 noyabr kuni surishtiruv byurosiga Ukraina sobiq prezidenti uyushgan jinoiy guruh rahbari bo‘lgani to‘g‘risidagi gumonlar taqdim etildi. Maʼlumotlarga ko‘ra, bu guruhga sobiq ichki ishlar vazirligi, Ukraina xavfsizlik xizmati va qurolli kuchlar vakillari kirgan. Ularning barchasi 2014 yil 18-20 fevral kunlari Kiyev markazida bo‘lib o‘tgan ommaviy norozilik namoyishlari paytida og‘ir va o‘ta og‘ir jinoyatlarni sodir etishda ayblanmoqda”, – deyiladi Ukraina surishtiruv byurosi matbuot xizmati tarqatgan xabarda.
Ushbu idora taxminiga ko‘ra, Yanukovich va uning qo‘l ostidagilar aholini qo‘rqitish maqsadida “teraktlar sodir etgan”. Byuro uyushgan jinoyat guruhini 76 fuqaro o‘limida ayblagan.
Maʼlumot o‘rnida: Viktor Yanukovich 2010-2014 yillarda Ukraina prezidenti bo‘lgan. 2014 yil fevral oyida boshlangan norozilik namoyishlaridan keyin u Rossiyaga qochib ketgan. Shundan keyin Ukraina bir qismi bo‘lgan Qrim Rossiyaga qo‘shib olindi. Mamlakat sharqida esa ayirmachilar bilan urush davom etmoqda.
Bundan avval Ukraina prezidenti Vladimir Zelenskiy "Pandora hujjatlari" ga munosabat bildirgandi.
