Украина президенти Владимир Зеленский "Пандора ҳужжатлари"га муносабат билдирди
Украина президенти Владимир Зеленский 17 октябрь куни илк бор "Пандора ҳужжатлари"га муносабат билдирди. Бу ҳақда” ТАСС” хабар берди.
Президентнинг сўзларига кўра, у ва унинг тарафдорлари пул ювиш билан шуғулланмаган.
"2019 йилга қадар нима билан шуғулланганимни одамлар билади. Бу телевидение ва кино. Собиқ президент Виктор Янукович даврида ҳамма ўз бизнесини яратган. Айниқса, ОАВ билан боғлиқ бизнес. Ҳамма каналлар чет элда компанияларга эга бўлган. Нима учун? Чунки бу бизнесингга сиёсат таъсир кўрсатмаслигининг ягона йўли эди. "Квартал-95" (Зеленскийнинг ТВ твдаги йирик лойиҳаси)нинг сатираси бўлгани учун унга ҳамма босим ўтказган", — деган Зеленский.
Унинг таъкидлашича, ўша пайтда "Квартал-95" га ҳар ҳафта солиқ идорасидан текширув келган. "Мен ва "Квартал-95"нинг ҳеч қайси аъзоси пул ювиш билан 2012 йилда ҳам, 2012 йилдан бошлаб ҳам шуғулланмаганмиз. Биз фақат ижод билан банд эдик"— дея қўшимча қилган у.
Шунингдек, Зеленский "Пандора"да ҳеч қандай янги фактларни кўрмаганини айтган. "Буларнинг барчаси эски гаплар",— дея қайд этди Украина етакчиси.
Маълумот ўрнида: "Пандора ҳужжатлари"да Украина президенти 2012 йилда шоуменлик қилган пайтларида пул ювиш билан шуғуллангани қайд этилган.
Бундан аввал Озарбайжон президенти "Пандора ҳужжатлари"га муносабат билдирганди. Шунингдек, Елизавета иккинчи номи ҳам келтирилгани хабар қилинганди.
Жаҳонгир Қўзиев
