Erdo‘g‘an Gretsiyaga jiddiy ayblov qo‘ydi
Bu migrantlar bilan bog‘liq.
Turkiya prezidenti Rajab Toyyib Erdo‘g‘an Gretsiyani noqonuniy migrantlar o‘limida aybladi. Bu haqda u Anqarada tashkil etilgan matbuot anjumanida aytib o‘tgan.
“Migrantlar bilan vaziyatni Turkiya bilan bog‘liq deyish – bu ko‘rnamaklik. Biz 5 million qochqinga joy berdik, ularning 4 millioni Suriyadan. Agar chegaralar ochiladigan bo‘lsa, Gretsiya ular bilan nima qilishini bilmayman. O‘rtayer va Egey dengizlarida aynan Gretsiya migrantlar ortilgan qayiqlarni – ularning ichida bolalar va ayollar borligiga qaramay – cho‘ktirishda davom etmoqda. Bizning qo‘limizda barcha dalillar bor. Siz butun dunyoni aldashingiz mumkin, ammo Turkiyani emas”, – degan Erdo‘g‘an.
Bundan avval Gretsiya bosh vaziri Kiriakos Mitsotakis Gollandiyalik jurnalist bilan nizolashib ketgan edi. Jurnalist Afinani migrantlarga nisbatan shafqatsiz munosabatda ayblagandi.
Avvalroq BMT qochqinlar soni keskin oshgani to‘g‘risida maʼlum qilgandi.
Jahongir Qo'ziyev
