Hindistonda sammit ishtirokchilari tomonidan Afg‘onistonda yuzaga kelgan vaziyat, mintaqaviy va global oqibatlari muhokama qilindi

 

Hindistonda mintaqadagi yettita mamlakatning milliy xavfsizlik bo‘yicha maslahatchilari va xavfsizlik kengashi kotiblarining uchrashuvi bo‘lib o‘tdi.

 

Ishtirokchilar qabul qilgan yakuniy deklaratsiyada Afg‘onistonning barcha halqi istayotgan ochiq va inklyuziv hukumat tuzilishi zarurligi taʼkidlangan. Bu haqda “Ovozi Tojik” radiosi Afg‘onistonning “Shafaqna” axborot agentligiga tayanib xabar bermoqda.

 

Xabarda aytilishicha, mintaqaviy uchrashuv chorshanba kuni Hindistonning milliy xavfsizlik bo‘yicha maslahatchisi Ajita Duala raisligida bo‘lib o‘tgan.

 

Uchrashuvda Afg‘onistonda hozirda yuzaga kelgan vaziyat, jumladan, xavfsizlik bilan bog‘liq holat va uning mintaqaviy va global oqibatlari muhokama qilingani aytilmoqda. Shuningdek, ishtirokchilar Afg‘onistonning hududiy yaxlitligini himoya qilish zarurligini taʼkidlab, tashqi kuchlarning aralashuviga qarshi ekanini bildirgan.

 

Milliy xavfsizlik bo‘yicha maslahatchilar va milliy xavfsizlik kengashi kotiblari o‘z murojaatlarida Afg‘oniston hududi terrorchilar faoliyat olib boradigan, ularga boshpana bo‘ladigan, o‘qitish, rejalashtirish va moliyalashtirish bilan shug‘ullanadigan joy bo‘lmasligi kerakligini alohida qayd etgan.

 

Ular shuningdek, mintaqada ekstremizm, separatizm va giyohvand moddalarning noqonuniy savdosi bilan bog‘liq tahdidlarga qarshi birgalikda kurashishga chaqirdi.

 

 Avvalroq, O‘zbekistonda jahon parlamentlarining ayol rahbarlari  sammiti bo‘lib o‘tishi  hamda Abdulaziz Komilov  din erkinliklari masalasiga bag‘ishlangan xalqaro sammitda ishtirok etgani haqida xabar bergandik.

 

Munojat Valiyeva