Парламент аёл раҳбарларининг навбатдаги саммити Ўзбекистонда бўлади
2022 йилда Ўзбекистонда жаҳон парламентларининг аёл раҳбарлари саммити бўлиб ўтади.
Бу ҳақда Вена шаҳрида бўлиб ўтган Парламентлараро Иттифоқ аъзо давлатлар парламентлари аёл раҳбарларининг 13 саммитида маълум қилинди.
Ушбу халқаро анжуманда Ўзбекистон тарафдан Олий Мажлис Сенати Раиси Танзила Норбоева қатнашган. У анжуман иштирокчиларини Ўзбекистонда гендер тенглик масаласида амалга оширилаётган ислоҳотлар билан таништирди.
Саммитда пандемиядан кейинги тикланиш жараёнида аёллар иштироки муҳокама қилинди. Норбоева ўзбек аёлларини иқтисодий қўллаб-қувватлаш, уларга турли грант ва кредитлар ажратилгани ҳамда таълим соҳасида берилган имтиёзларга эътибор қаратди. Шунингдек, республикада хотин-қизларнинг сиёсий фаоллигини ошириш борасида амалга оширилаётган ишлар алоҳида таъкидланди.
Эслатиб ўтамиз, бундан аввал Туркманистонда Марказий Осиё етакчи аёллари мулоқотининг форуми бўлиб ўтгани хабар қилинган эди.
