Filcha barcha saʼy-harakatlarga qaramay, halok bo‘ldi
Indoneziyaning Sumatra orolida yo‘qolib ketish xavfi ostida turgan fillar tishlari uchun brakonyerlarning o‘ljasiga aylanmoqda.
Ovchilar ularni tutish uchun tuzoqlar qo‘yishmoqda. Mahalliy aholi fillarning so‘nggi vakillaridan biri bo‘lgan 1 yoshli filchani tuzoqdan qutqarib olishdi.
Ammo jonzot juda qattiq yaralanganligi sababli halok bo‘lgan. Ungacha mahalliy aholi vakillari filchaning omon qolishi uchun ko‘p harakat qilishgan.
Fil bolasining tanasi tuzoq tufayli yaralangan va infeksiya tushgan. Davolash jarayonida esa zararlangan tana qismi kesib tashlangan. Ammo, afsuski, bu ham uning hayotini saqlab qolishga yordam bermagan. Chunki infeksiya allaqachon uning butun organizmini zaharlab ulgurgan edi. Shunday bo‘lsa-da, filcha operatsiyadan so‘ng yana ikki kun yashagan.
"Uni qutqara olmadik, chunki u og‘ir jarohatlangan va infeksiyalangan edi. Biz yordam berish uchun qo‘limizdan kelganini qildik”, - deydi Tabiiy resurslarini muhofaza qilish departamenti rahbari Agus Arianto.
Jonzotlarning asosiy yashash joylari o‘rmon, biroq daraxtlarning kesilishi fillar yashaydigan hududlarning qisqarishiga olib kelmoqda. Bu esa odamlar va fillarning tez-tez to‘qnashishi, o‘zaro ziddiyatga duch kelishiga sabab bo‘lada. Oqibatda esa, fillar qimmatbaho tishlari uchun qurbon qilinadi.
Manbalarda yozilishicha, yovvoyi tabiatda yashayotgan mintaqadagi Sumatra fillarining soni atigi 500 ta qolgan.
Maʼlumotlarga ko‘ra, ayniqsa so‘nggi yillarda mintaqada fillarni so‘yish ko‘paygan. Masalan, iyul oyida Sumatra fillarining biri boshi kesilgan va tishlari olib tashlangan holda topilgan.
Avvalroq jayron ovlovchilar ustidan sud hukmi o‘qilgani haqida xabar berilgandi.
Olamgir Abdiyev
