O‘zbekiston hududi orqali Tojikistonga xavfli yuklarni olib o‘tish tartibi soddalashtiriladi
Hozirgi vaqtda qonunga asosan tranzit ruxsatnomasining amal qilish muddati 30 kundan oshmaydi.
Transport vazirligi “Xalqaro shartnoma tasdiqlash to‘g‘risida” prezident qarori loyihasini tayyorladi.
“Tojikiston tomoni O‘zbekiston hududi orqali Tojikistonning xavfli yuklarini olib o‘tish uchun ruxsatnomani 1 oydan 1 yilgacha cho‘zish imkoniyatini ko‘rib chiqishni so‘rab murojaat qilgan”, — deyiladi hujjatda.
Maʼlumot uchun: kelishuvga muvofiq, O‘zbekiston Transport vazirligi O‘zbekiston Respublikasi hududi orqali xavfli yuklar olib o‘tilishi bo‘yicha qaror qabul qilish va ruxsat berish vakolatiga ega vakolatli organ hisoblanadi.
Qayd etilishicha, ariza beruvchilar yoki ekspeditorlik tashkiloti tashishni boshlashdan oldin O‘zbekiston tomoni vakolatli organini boshqa davlatlar tomonidan berilgan, ularning hududlari orqali tranzitni amalga oshirish rejalashtirilgan zarur tranzit ruxsatnomalarining mavjudligi to‘g‘risida xabardor qiladi.
O‘zbekiston va Tojikiston hukumatlari o‘rtasida O‘zbekiston Respublikasi hududi orqali xavfli yuklarni olib o‘tish to‘g‘risidagi kelishuv loyihasi ishlab chiqildi va O‘zbekiston prezidenti 10 iyun kuni Tojikistonga amalga oshirilgan rasmiy tashrif jarayonida imzolandi.
Tranzit bir yilgacha muddatga beriladigan umumiy yoki bir martalik ruxsatnoma asosida amalga oshiriladi.
Eslatib o‘tamiz, avvalroq O‘zbekiston — Tojikiston chegaralari xaritalarda aniq belgilanishi hamda O‘zbekiston navbatdagi xalqaro shartnomaga qo‘shilgani haqida xabar berilgandi.
