Ўзбекистон навбатдаги халқаро шартномага қўшилди
Шавкат Мирзиёевнинг БМТнинг Осиё ва Тинч океани иқтисодий ва ижтимоий комиссиясининг (UNESCAP) “Қуруқлик портлари” тўғрисидаги ҳукуматлараро битимига қўшилишга оид қарори қабул қилинди.
Шартноманинг асосий мақсади — Осиё — Тинч океани минтақасида транспорт ташувларини уйғунлаштириш ва енгиллаштириш учун халқаро аҳамиятга эга бўлган логистика марказларини (қуруқлик портларини) қуриш ва ишлатиш бўйича кўрсатмаларни ишлаб чиқиш.
Халқаро шартномани амалга ошириш бўйича Ўзбекистон номидан Транспорт вазирлиги масъул ваколатли орган этиб белгиланди.
Шартнома Ўзбекистон логистика марказларининг (қуруқлик портларини) халқаро аҳамиятга эга объектлар сифатида қабул қилиниши ва рўйхатга киритилиши имконини бериши кутилмоқда.
Маълумот учун, Бирлашган Миллатлар Ташкилотининг Осиё ва Тинч океани учун иқтисодий ва ижтимоий комиссияси 1947 йил март ойида ташкил этилган. Бош қароргоҳи Бангкокда жойлашган. Комиссия минтақавий ва субрегионал ҳамкорликни кучайтириш орқали Осиё — Тинч океани мамлакатларини ижтимоий-иқтисодий ривожланишига кўмаклашиш учун ишлаб чиқилган.
Аввалроқ Ўзбекистон ва Туркманистон ўртасида 23 та ҳужжат имзоланганди. Шунингдек, Ўзбекистон ва Россия бош прокурорлари ўртасида меморандум ҳамда Фарғона вилояти делегациясининг Қирғизистонга сафари давомида икки томон ўртасида ўндан ортиқ шартнома имзолангани ҳақида хабар берилганди.
