Farg‘ona viloyatidan 253,5 tonna malina xorijga eksport qilindi
Polsha, Qirg‘iziston, Rossiya, Turkiya va Qozog‘istonga yuborildi.
Davlat bojxona qo‘mitasi xabariga ko‘ra, jami eksport qilingan 253,5 tonna malinaning 114,1 tonnasi Polshaga, 50,7 tonnasi Qirg‘izistonga, 43,1 tonnasi Rossiyaga, 38 tonnasi Turkiyaga va 7,6 tonnasi Qozog‘istonga yuborildi.
Qayd etilishicha, joriy yilning o‘tgan 10 oyi davomida umumiy qiymati 578 ming dollarlik malina Polsha, Qirg‘iziston, Rossiya, Turkiya va Qozog‘iston kabi davlatlariga boshqarmaning “Vodiy” va “Marg‘ilon” tashqi iqtisodiy faoliyat bojxona postlari tomonidan eksportga rasmiylashtirildi.
Eslatib o‘tamiz, Farg‘ona tumani iqlimi malina yetishtirish uchun mos ekanligi hisobga olinib, yangi rezavor plantatsiyalari uchun 300 gektar bo‘sh va foydalanilmayotgan yer ajratilgan. Hozirda quduqlarni burg‘ulash va nasoslar o‘rnatish ishlari boshlangan.
Avvalroq O‘zbekiston yanvar-sentyabr oylarida xorijga qancha miqdorda meva va sabzavot eksport qilgani maʼlum bo‘lgandi. Shuningdek, uzumchilik klasterlari tashkil etilishi, bodring eksporti 2,5 million AQSH dollariga oshgani, O‘zbekiston 8,9 ming tonna shaftoli eksport qilgani hamda Qoraqalpog‘iston Respublikasi va viloyatlarda 44 ta yangi eksportbop uzum plantatsiyalari yaratilishi haqida xabar berilgandi.
