O‘zbek kinoijodkorlari delegatsiyasi Rossiyadagi festivalda ishtirok etdi
Endilikda, yosh ijodkorlarni qo‘llab-quvvatlash hamda isteʼdodlarini yuzaga chiqarish bo‘yicha yangi loyihalar taqdim etiladi.
Kinematografiya agentligi axborot xizmatining xabar qilishicha, kuni kecha o‘zbek kinoijodkorlari delegatsiyasi Butunrossiya davlat kinematografiya instituti (VGIK)ning 41-xalqaro talabalar festivalida ishtirok etdi.
Qayd etilishicha, o‘zbek kinoijodkorlari rossiyalik kinoprodyuserlar va ijodkorlar bilan bo‘lib o‘tgan suhbatda Kinematografiya agentligi, Milliy kinematografiyani rivojlantirish markazi, “O‘zbekfilm” kinokonserni tomonidan amalga oshiriladigan ko-produksiyalar bo‘yicha hamkorliklar kelishib olindi.
Taʼkidlanishicha, Firdavs Abduxoliqov agentlik tomonidan 2 yil davomida Moskvaga o‘qishga yuborilgan talabalar bilan uchrashdi. Mahorat darslari va davra suhbatlari tashkil etilib, malakali dars olishdagi sharoitlari o‘rganildi.
Maʼlumot uchun: VGIK direktori Vladimir Malishevga agentlik bosh direktori Firdavs Abduxoliqov “O‘zbekiston Respublikasi Mustaqilligining 30 yilligi” ko‘krak nishonini taqdim etdi.
Eslatib o‘tamiz, endilikda o‘zbek kinoijodkorlari 20-26 noyabr kunlari bo‘lib o‘tadigan Belarus Respublikasida “Listapad” XVII xalqaro Minsk kinofestivalida ishtirok etadi.
Avvalroq O‘zbekistonda Milliy kinematografiyani rivojlantirish markazi tashkil etilishi, Toshkentda Turk dunyosi iqtidorli bolalari festivali bo‘lib o‘tishi, O‘zbekiston, Qozog‘iston va Rossiya hamkorligida Xo‘ja Nasriddin haqida multfilm suratga olinishi haqida xabar berilgandi.
