Senat raisi Rossiya Federatsiya Kengashi raisini orden bilantaqdirladi
Mazkur mukofot ikki xalq o‘rtasidagi do‘stlik, strategik sheriklik va ittifoqchilik munosabatlarini mustahkamlashga faol saʼy-harakatlari va shaxsiy hissasi uchun berildi.
Bu haqda Senat Axborot xizmati xabar berdi.
2021 yilning 26 noyabr kuni MDH PPA 53-yalpi majlisida O‘zbekiston Respublikasi Oliy Majlisi Senati Raisi Tanzila Narboyeva Rossiya Federatsiyasi Federal Majlisi Federatsiya Kengashi Raisi Valentina Matviyenkoga O‘zbekiston Respublikasi Prezidenti Sh.Mirziyoyev nomidan “Do‘stlik” ordenini topshirdi.
Mazkur mukofot O‘zbekiston Respublikasi Prezidenti Sh.Mirziyoyevning farmoniga muvofiq, O‘zbekiston Respublikasi bilan Rossiya Federatsiyasi o‘rtasidagi do‘stlik, strategik sheriklik va ittifoqchilik munosabatlarini mustahkamlashga faol saʼy-harakatlari va shaxsiy hissasi uchun berildi.
Bundan tashqari, ikki davlat o‘rtasidagi hamkorlikni har tomonlama qo‘llab-quvvatlagani uchun parlamentlararo aloqalarni rivojlantirish, ko‘p qirrali O‘zbekiston-Rossiya hamkorligi, shu jumladan, mintaqalararo hamkorlik va ikki tomonlama madaniy-gumanitar almashinuv salohiyatini to‘liq ochib berishga qaratilgan dasturlar va loyihalarni samarali amalga oshirishga ko‘maklashishga qo‘shgan hissasi ham hisobga olingan.
Maʼlumot o‘rnida: Tanzila Norboyeva Mustaqil Davlatlar Hamdo‘stligi Parlament Assambleyasi Kengashi majlisida “Parlament hamkorligini mustahkamlash uchun” medali bilan taqdirlangandi.
Eslatib o‘tamiz, avvalroq sobiq Xalq taʼlimi vaziri Sherzod Shermatov “Do‘stlik” ordeni bilan mukofotlangani haqida xabar berilgandi.
Cho‘lponoy Ahmedova
