Istanbuldagi dovul qurbonlari soni 4 nafarga yetdi
To‘fon shahar binolari tom qismi va harakatlanayotgan transport vositalarini uchirib ketgan.
Maʼlum bo‘lishicha, tabiiy ofat 33 ta uyning tom qismini vayron qilgan, 192 ta daraxt va 52 ta svetofor qurilmasini qulatgan.
Bundan tashqari, o‘nlab avtomobillar shikastlangan.
“Favqulodda vaziyatlar va tabiiy ofatlar departamenti maʼlumotlariga ko‘ra, Istanbulda boshlangan kuchli shamol oqibatida 4 kishi halok bo‘lgan, 19 kishi jarohatlangan, ulardan 3 nafari og‘ir ahvolda ” — deyiladi xabarlarda.
Turkiya qirg‘oq qo‘riqlash xizmatining xabariga ko‘ra, favqulodda vaziyat ortidan Bosfor bo‘g‘ozida kemalar harakati to‘xtatilgan.
Shuningdek, Turkiya Havo yo‘llarining olti samolyoti Istanbulga qo‘na olmay, Anqara va Izmirga yo‘naltirildi.
Bundan avval AQSHning Luiziana shtatiga dahshatli to‘fon kirib kelgani hamda Yaponiyada to‘fon tufayli 400 nafarga yaqin odam evakuatsiya qilingani haqida xabar berilgandi.
Cho‘lponoy Ahmedova
