29 август куни штат қирғоқларига “Ида” тўфони кириб келди. Синоптикларнинг фикрича, бу сўнгги 16 йилдаги энг даҳшатли табиий офат ҳисобланади. Штат губернатори Жон Белл Эдвардс штатда ҳолат оғирлигини, кейинги 24 соат ичида ҳалокатли вазият сақланиб қолишини айтган.
“Бу жиддий тўфон. Штат учун бу жиддий синов бўлади. “Ида” Луизиана касалхоналари учун ҳақаиқий муаммо бўлади. Сабаби сўнгги ҳафтада COVID-19 билан касалланганлар сони ҳам ортган”, - деган губернатор.
Эдварснинг маълум қилишича, табиий офат шифохоналар фаолиятига ҳам таъсир қилди. Хусусан, коронавирусга чалинган беморларни эвакуация қилиш ва янги касалланганларни жойлаштиришнинг имкони бўлмаяпти.
Бундан сал олдин “Ида”га ҳалокатлиликнинг 4-даражаси берилди. Таҳлиллар шамол тезлиги соатига 250 километрни ташкил этгананини кўрсатмоқда.
Шаҳарда кўплаб бинолар вайронага айланган. Дарахтлар илдизи билан суғирилган.
Сўнгги маълумотларга кўра, Янги Орлеан шаҳрида бир миллионга яқин фуқаро электр тармоғидан узилган. Интернет ҳам ишламаяпти. Шунингдек, 390 минг киши эвакуацияга муҳтож. Шу мақсадда Миллий Гвардиянинг 260 аскари ёрдамга етиб келган.
Тўфон шимоли-ғарбий йўналишга қараб кетмоқда. Алабама, Миссисипи ва Флорида штатларида торнадо хавфи эълон қилинган.
АҚШ президенти Жозеф Байден Луизианада табиий офат ҳолатини эълон қилди. Президент шунингдек, маҳаллий ҳокимиятга тўфон оқибатларини бартараф этиш учун моддий ёрдам ажратиш юзасидан буйруқ берган.
Маълумот ўрнида, Луизиана ўтмишда ҳам бу каби табиий офатлар билан тўқнаш келган. Хусусан, 2005 йилда штатда “Катрина” тўфони бўлиб ўтган, оқибатда 1 800 киши ҳалок бўлган. Ўшанда Янги Орлеаннинг 80 фоизи сув остида қолган, жами 108 миллиард долларлик зарар кўрилган. Лекин “Ида” штат тарихида охирги 107 йил ичида кузатилган энг кучли тўфон сифатида баҳоланмоқда.
Жаҳонгир Қўзиев